ރައްޔިތުންގެ މަޖިލީހުގެ އިދާރާއިން އިންތިޒާމް ކޮށްގެން ކުރިއަށްގެންދާ ޕާލިމެންޓްރީ އެޑިއުކޭޝަން ސެމިނަރ ފަށައިފިއެވެ.

އައްޑޫ ސިޓީގައި ހޮނިހިރު ދުވަހު ފެށި މި ސެމިނަރއާ ބެހޭ ގޮތުން ރާއްޖެއެމްވީއަށް ރައްޔިތުންގެ މަޖިލީހުގެ މީޑިއާ ޑިރެކްޓަރު، ހަސަން ޒިޔާއު ވިދާޅުވީ، މި ސެމިނަރއަކީ ރައްޔިތުންގެ މަޖިލީހުން 2007 ވަނަ އަހަރާ ހަމައަށް ކުރިއަށް ގެންގޮސްފައިވާ ސެމިނަރއެއް ކަމަށެވެ. އަދި 12 އަހަރުގެ މެދުކެނޑުމަށްފަހު އަނެއްކާ ވެސް މި ސެމިނަރ ފެށީ ސްކޫލު ކުދިންގެ މެދުގައި ޕާލިމެންޓްރީ އެޑިއުކޭޝަން ދިނުމަކީ ވަރަށް މުހިންމު ކަމެއް ކަމަށްވާތީ ކަމަށް އޭނާ ވިދާޅުވިއެވެ.

ޒިޔާއު ވިދާޅުވީ އައްޑޫ ސިޓީގެ ޝަރަފުއްދީން ސްކޫލުގައި ކުރިއަށްދާ ސެމިނަރގައި އައްޑޫގެ ހުރިހާ ސްކޫލުތަކުން ޖުމްލަ 185 ދަރިވަރުން ބައިވެރިވާ ކަމަށެވެ. ގްރޭޑް 9، 10 އަދި 11 ގައި ތައުލީމް ހާސިލްކުރާ ދަރިވަރުން ބައިވެރިވާ މި ސެމިނަރއަކީ އެއްދުވަހުގެ މުއްދަތަށް ކުރިއަށް ގެންދާ ސެމިނަރއެކެވެ.

ސެމިނަރގައި މަޖިލީހާއި ގުޅުން ހުރި ގިނަ މައުލޫމާތުތަކެއް ފޯރުކޮށްދެވިގެންދާއިރު ސިލްސިލާ ގޮތަށް ކުރިއަށް ގެންދާ ސެމިނަރ އަތޮޅު ތެރޭގެ އެހެން ރަށްރަށުގައި ވެސް ކުރިއަށް ގެންދާނެ ކަމަށް ރައްޔިތުންގެ މަޖިލީހުން ބުނެއެވެ.