ކޫލީ ނަންބަރ 1'' ގެ ސެޓްގައި ރޯވި އަލިފާނުގެ ސަބަބުން އެއްވެސް މީހަކަށް އަނިޔާނުވޭ

ބުދަ ދުވަހު ފިލްމު ''ކޫލީ ނަންބަރ 1'' ގެ ސެޓްގައި ހިނގި އަލިފާނުގެ ހާދިސާ ގައި އެއްވެސް މީހަކަށް ގެއްލުންނުވާ ކަމަށް އެ ފިލްމުގެ ޕްރޮޑިއުސަރު ޖެކީ ބަގްނާނީ ބުނެފިއެވެ.

މުމްބާއިގެ ފިލްމިސްތާން ސްޓޫޑޯގައި ހުންނަ ކޫލީގެ ސެޓްގައި އަލިފާން ހިފާފައިވަނީ ބުދަ ދުވަހުގެރޭ ދަންވަރުގެ ވަގުތެއްގައި ޝޫޓިން ކުރިޔަށް ދަނިކޮށެވެ. އަލިފާން ރޯވަން މެދުވެރިވި ސަބަބު މިހާތަނަށް ހަމާކޮށްފައެއް ނުވެއެވެ. އެ ހާދިސާގައި އެއްވެސް މީހަކަށް ގެއްލުމެއް ލިބިފައިނުވާ ކަމަށް ކޫލީގެ ޕްރޮޑިއުސަރ ޖެކީ ވަނީ ބުނެފައެވެ. ރިޕޯޓްތައް ބުނާ ގޮތުން ވަގުތީ ގޮތުން ފިލްމުގެ ޝޫޓިން ވަނީ ދުވަސްކޮޅަކަށް މެދުކަނޑާލަފައެވެ.

ޑޭވިޑް ދަވަން ޑައިރެކްޓްކުރާ ފިލްމް "ކޫލީ ނަމްބަރު1" ރީމޭކް ގެ ޝޫޓިންތައް ފަށާފައިވަނީ މިދިޔަ މަހުއެވެ. ފިލްމްގައި ލީޑް ރޯލުން ފެނިގެންދާނީ މިދިޔަ އަހަރު "ކެދަރްނާތް" އިން ބޮލީވުޑަށް ތަޢާރަފްވި ސާރާ އަލީ ޚާން އާއި ވަރުން ދަވަންއެވެ.

1995 ވަނަ އަހަރު ރިލީޒް ކުރި ކޮމެޑީ ފިލްމް "ކޫލީ ނަމްބަރު1" ގެ ލީޑް ރޯލުން ފެނިގެން ގޮސްފައިވަނީ ގޯވިންދާ އާއި ކަރިޝްމާ ކަޕޫރެވެ. މި ފިލްމަކީ "ޖުޅުވާ2" އަށް ފަހު ވަރުން އޭނާ ގެ ބައްޕަ ޑޭވިޑް ދަވަން އާއި އެކު މަސައްކަތް ކުރާ ފިލްމެވެ. ވަރުން އެންމެ ފަހުން ފެނިގެން ގޮސްފައިވަނީ މިމަހުގެ 17 ގައި ރިލީޒް ކުރި ފިލްމް "ކަލަންކް" އިންނެވެ. އަދި ސާރާ އެންމެ ފަހުން ފެނިގެން ގޮސްފައިވަނީ މި ދިޔަ އަހަރު ރިލީޒް ކާމިޔާބު ފިލްމް "ސިމްބާ" އިންނެވެ.