2018 ވަނަ އަހަރުގެ ސާނަވީ އިމްތިހާނުގައި ރާއްޖޭގެ ހަ ދަރިވަރަކު، ދުނިޔޭގެ އެއްވަނައިގަ ހިމެނިފައިވޭ
53 ދަރިވަރަކު ވަނީ އެކި މާއްދާތަކުން ދުނިޔޭގެ ފެންވަރުގައި ހިމެނިފަ
ޓޮޕް އެޗީވާސް އެވޯޑް ގެ ހަފްލާގެ ތެރެއިން
2018 ވަނަ އަހަރުގެ ސާނަވީ އިމްތިހާނުގައި ތަފާތު މާއްދަތަކުން ރާއްޖޭގެ ހަ ދަރިވަރަކު، މުޅި ދުނިޔެއިން އެއްވަނަ ހޯދައިފިއެވެ.
ސާނަވީ އިމްތިހާނުން ވަނަވަނައަށް ދިޔަ ދަރިވަރުންނަށް އިނާމު ދިނުމަށްޓަކައި ދަރުބާރުގޭގައި ބުރާސްފަތި ދުވަހުގެ ރޭ ވަނީ ޖަލްސާއެއް ބާއްވަފައެވެ. ރައީސް އިބްރާހިމް މުހައްމަދު ސޯލިހު ވަނީ މި ޖަލްސާ ޝަރަފުވެރި ކޮށްދެއްވާފައެވެ. އަދި ނައިބު ރައީސް ފައިސަލް ނަސީމާއި އެޑިއުކޭޝަން މިނިސްޓަރ އައިޝަތު އަލީގެ އިތުރުން ހެލްތް މިނިސްޓަރ އަބްދުﷲ އަމީންވެސް މި ޖަލްސާގައި ބައިވެރިވެވަޑައިގެންފައިވެއެވެ.
މި ޖަލްސާގައި ވަނަވަނައަށް ދިޔަ ދަރިވަރުންނަށް އިނާމު ދީފައިވާއިރު، 53 ދަރިވަރަކު ވަނީ އެކި މާއްދާތަކުން ދުނިޔޭގެ ފެންވަރުގައި ހިމެނިފައެވެ. އެގޮތުން ހަ ދަރިވަރަކު ވަނީ ދުނިޔޭގެ އެއްވަނަ ހޯދާފައެވެ.
ދުނިޔޭގެ އެއްވަނަ ހޯދި ދަރިވަރުންނަކީ، ދަރުމަވަންތަ، ހއ. އުލިގަމު، އަހުމަދިއްޔާ އިންޓަރނޭޝަނަލް ސްކޫލް އިސްކަންދަރު ސްކޫލް އަދި ބިލަބޮންގް ސްކޫލުން ސާނަވީ އިމްތިހާން ނިންމި ދަރިވަރުންނެވެ.
މި ލިސްޓުގައި ހިމެނެނީ، މެރިން ސައިން މާއްދާއިން އެއްވަނަ ހޯދި ދަރުމަވަންތަ ސްކޫލުގެ ދަރިވަރު އިބްރާހިމް ޔައިޝް ޝާކިރު، ބިޒްނަސް އަދި އިކޮނޮމިކްސް އިން އެއްވަނަ ހޯދި އަހުމަދިއްޔާ އިންޓަރނޭޝަނަލް ސްކޫލުގެ ދަރިވަރު އަހުމަދު ރަސަލް ތަސްލީމް އަދި ބަޔޮލޮޖީން އެއްވަނަ ހޯދި އިސްކަންދަރު ސްކޫލުގެ ދަރިވަރު ޒަޔާން އަބްދުﷲ ނާޒިލްގެ އިތުރުން ޓްރެވެލް އެންޑް ޓޫރިޒަމް އިން ހަމަ އެސްކޫލުން ދުނިޔޭގެ އެއްވަނަ ހޯދި ދަރިވަރު އާމިނަތު ލާމިއާ މަގްބޫލް އާއި ސޯޝަލޮޖީން އެއްވަނަ ހޯދި ބިލަބޮންގްގެ ދަރިވަރު އަޒްމާން އަބްދުﷲ އެވެ.
2018 ވަނަ އަހަރުގެ އޯލެވެލް އިމްތިހާނުގައި ބައިވެރިވި ދަރިވަރުންގެ ތެރެއިން 404 ދަރިވަރަކު ގަދަ 10 ގައި ހިމެނިފައިވާއިރު ރާއްޖެއިން މި އިމްތިހާނުގައި 6000 ދަރިވަރަކު ބައިވެރިވެފައިވެއެވެ.
ރާއްޖޭގެ ގަދަ ދިހައެއްގެ އެއްވަނައިގައި އަށް ދަރިވަރަކު ހިމެނިފައިވެއެވެ.
