ފަލަސްތީން މައްސަލާގައި އޯއައިސީގެ އިމެޖެންސީ ސަމިޓަށް މިނިސްޓަރ ޝާހިދު ފުރާވަޑައިގަންނަވަނީ
ފަލަސްތީން މައްސަލާގައި ފެށުނީއްސުރެން ދިވެހިރާއްޖެ އިން ދަނީ އަމަލީގޮތުން އަޑު އުފުލަމުން ކަމަށް ވިދާޅުވި
ފޮރިން މިނިސްޓަރ އަބްދުﷲ ޝާހިދު
އޮގަނައިޒޭޝަން ފޯ އިސްލާމިކް ކޯޕަރޭޝަން (އޯއައިސީ) ގެ ފަރާތުން ބާއްވާ ޚާރިޖީ ވަޒީރުންގެ އިމަޖެންސީ ކުއްލި ޖަލްސާގައި ބައިވެރިވެ ވަޑައިގަތުމަށް ފޮރިން މިނިސްޓަރ އަބްދުﷲ ޝާހިދު ޖިއްދާއަށް ވަޑައިގަތުމަށް ހަމަޖެހިއްޖެ އެވެ.
ރާއްޖެ ޓީވީގެ ފަލަ ސުރުޚީ ޕްރޮގްރާމުގައި ވާހަކަ ދައްކަވަމުން މިނިސްޓަރ ވިދާޅުވީ އަންނަ އާދިއްތަ ދުވަހު ޖިއްދާގައި ބޭއްވުމަށް ހަމަޖެހިފައިވާ އިސްލާމީ ގައުމު ތަކުގެ ޚާރިޖީ ވަޒީރުންގެ ކުއްލި ޖަލްސާގައި ބައިވެރިވެ ވަޑައިގަތުމަށް ހަމަޖެހިފައިވާ ކަމަށެވެ.
މިނިސްޓަރ ވިދާޅުވީ 1976 ގައި އޯއައިސީ އުފެދިގެން އައީ އަލް ޤުދުސް އައްޝަރީފް މިނިވަން ކުރަން ކަމަށެވެ. އަދި ދިވެހިރާއްޖެ އަކީ އޯއައިސީގެ މެންބަރެއް ކަމަށާއި ފެށުނީއްސުރެން ދިވެހިރާއްޖެ އިން ދަނީ އަމަލީގޮތުން އެކަމުގައި އަޑު އުފުލަމުން ކަމަށެވެ.
އިސްރާއީލުގައި އަންނަ ހަފްތާގައި އޮންނަ އިންތިހާބުން ކަމިޔާބު ވެއްޖެނަމަ ހުޅަނގު އައްސޭރީގެ ޖޯޑަން ވެލީ އިސްރާއީލުގެ ތަނަކަށް ހަދާނެ ކަމަށް އިސްރާއިލުގެ ބޮޑުވަޒީރު ބެންޖަމިން ނަތަން ޔާހޫ ވިދާޅުވުމާއި ގުޅިގެން، އެކަން ކުށްވެރިކޮށް ފޮރިން މިނިސްޓްރީން ވަނީ ބަޔާނެއް ނެރެފައެވެ.
މިނިސްޓަރ ވިދާޅުވީ މިމައްސަލައިގައި ފަސްޖެހުމެއް ނޯންނާނެ ކަމަށާއި ބަސް ބުނުމުގައި ދިވެހިރާއްޖެ އިން ފަސް ނުޖެހޭނެ ކަމަށެވެ. އަދި ބޭނުންވަނީ އިސްލާމީ އުއްމަތް އެކަތިގަނޑަކަށްވެ މިކަމާއި ނަފްރަތުކޮށް ދެކޮޅުހަދާކަން ސާބިތުކޮށްދިނުން ކަމަށާއި އެއްއަޑަކުން ވާހަކަ ދެއްކުންކަން މިނިސްޓަރ ފާހަގަކުރެއްވި އެވެ.
މިނިސްޓަރ އިތުރަށް ވިދާޅުވީ މި މައްސަލައިގައި އަޑު އުފުލައިފައިއިވަނީ އިސްލާމީ އުއްމަތް އެކަނި ނޫން ކަމަށާއި މުސްލިމް ނޫން ގައުމުތަކުންވެސް މިކަމުގައި ބަސްބުނަމުން ގެންދާ ކަމަށެވެ. އެގޮތުން އީޔޫގެ ފަރާތުން ވެސް ވަނީ އަޑު އުފުލާފައިކަމަށާއި ޔޫއެންގެ ސެކްޓްރްރީ ޖެނެރަލްވެސް ވަނީ މިކަމާއި ދެކޮޅަށް ބަޔާން ނެރުއްވާފައިކަން މިނިސްޓަރ ފާހަގަކުރެއްވިއެވެ.
އޯއައިސީގެ ފަރާތުން ކުއްލި ޖަލްސާއެއް ބާއްވަނީ ފަލަސްތީނުގެ މައްސަލައިގައި އިސްލާމީ އުއްމަތް އެކަތިގަނޑަކަށް ވެފައި އޮތްތަން ޖަލްސާގައި ހާމަކޮށް ރާއްޖޭގެ ފަރާތުން ބައިވެރިވެ ރާއްޖެ ދެކޭ ގޮތް ހަރުކޮށް އެޖަލްސާގައި ބުނެދޭން ކަމަށް މިނިސްޓަރ ވިދާޅުވިއެވެ.
