އިތުރު 4 ގެއަކާއި ކެފޭއެއް ބަލާ ފާސްކޮށްފި
11 ސެޕްޓެމްބަރު 2019 | ބުދަ 13:03ކަނޑުމަގުން ހިންގި އޮޕަރޭޝަން އެއްގައި މާލެ ސަރަހައްދުގައި އޮތް ބޯޓެއްގައި ހުރި މީހަކުވެސް ބަލާފާސްކޮށްފައި
ފުލުހުން ހިންގަމުންދާ އޮޕަރޭޝަނުގެ ތެރެއިން
މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބަލާ ކޮމިޝަނުން ތަހުގީގު ކުރަމުންދާ މައްސަލަތަކާ ގުޅިގެން ބުދަ ދުވަހު ފުލުހުން ހިންގި އޮޕަރޭޝަނުގައި މިހާތަނަށް ހަތަރު ގެއަކާއި ކެފޭއެއް ފާސްކޮށްފައިވާ ކަމަށް ފުލުހުން ބުނެފިއެވެ.
ފުލުހުން ބުނެފައިވަނީ ކަނޑުމަގުން ހިންގި އޮޕަރޭޝަން އެއްގައި މާލެ ސަރަހައްދުގައި އޮތް ބޯޓެއްގައި ހުރި މީހަކު ވެސް ބަލާފާސްކޮށްފައިވާ ކަމަށެވެ.
މި އޮޕަރޭޝަންގައި އެއްވެސް މީހަކު އަދި ހައްޔަރުކޮށްފައެއް ނުވެއެވެ. މިއީ މީހުންނާއި ތަންތަން ބަލާފާސްކުރުމުގެ އޮޕަރޭޝަނެކެވެ. އެގޮތުން މި އޮޕަރޭޝަން އަދި ހުއްޓުމަކަށް ނާދެއެވެ.
އަންގާރަ ދުވަހާއި ބުދަ ދުވަހު ފުލުހުން ކުރި މަސައްކަތުން ޖުމްލަ 13 ތަނެއް ވަނީ ބަލާފާސްކޮށްފައެވެ. އެއީ މާލެ ސިޓީ އިން 12 ތަން އަދި އައްޑޫ ސިޓީން އެއް ތަނެވެ. މީގެ އިތުރުން ފުލުހުން ވަނީ އައްޑޫސިޓީގެ ގެއެއް ބަލާފާސްކުރުމަށް ފަށާފައެވެ.
މި ތަންތަން ބަލާފާސްކުރުމަށް މަރުތަކާއި ގެއްލުވާލާފައިވާ މީހުންގެ މައްސަލަތަށް ބަލާ ކޮމިޝަނުގެ އެދުމަށް ކޯޓުން ނެރެފައިވާ އަމުރުތައް ތަންފީޒުކުރުމަށް ކަމަށްވެސް ބުނެފައިވެއެވެ.
މި އޮޕަރޭޝަނަކީ ފުލުހުންގެ ކްރިމިނަލް އިންވެސްޓިގޭޝަން ކޮމާންޑާއި ފޮރެންސިކް ސަރވިސް ޑިޕާރޓްމެންޓް އަދި ޑިވިޒަނަލް ޕޮލިސިންގ ކޮމާންޑުން ކުރިއަށްގެންދާ އޮޕަރޭޝަނެކެވެ. އަދި މޯލްޑިވްސް ޑިފެންސް ފޯސް (އެމްއެންޑީއެފް) ން ވެސް ފުލުހުންނަށް މިކަމުގައި އެހީތެރިކަން ފޯރުކޮށްދެމުން ދާކަން ފާހަގަ ކޮށްލެވެއެވެ.
