ހުޅުމާލެ ހޮސްޕިޓަލް ތަރައްގީ ކުރުމުގެ މަސައްކަތް ކޮށްފައިވަނީ ޕްލޭނެއް ނެތި: މެނޭޖިން ޑިރެކްޓަރު
11 ސެޕްޓެމްބަރު 2019 | ބުދަ 03:22ޕްރޮޖެކްޓްތައް ހިންގާފައިވަނީ ވަކިބަޔަކަށް މަންފާ ލިބޭ ގޮތަށް
ހުޅުމާލެ ހޮސްޕިޓަލް
ރައީސް އަބްދުﷲ ޔާމީންގެ ސަރުކާރުން ހުޅުމާލެ ހޮސްޕިޓަލް ތަރައްގީ ކުރުމުގެ މަސައްކަތް ކޮށްފައިވަނީ އެއްވެސް ޕްލޭނެއް ނެތި ވަކި ބަޔަކަށް ނާޖާއިޒް މަންފާތަކެއް ލިބޭ ގޮތަށް ކަމަށް އާސަންދަ ކުންފުނީގެ މެނޭޖިން ޑިރެކްޓަރުގެ މަރިޔަމް ޝަފީގް ވިދާޅުވެއްޖެއެވެ.
ރާއްޖެޓީވީގެ ''މަގޭ ކުންފުނި'' ޕްރޮގްރާމްގައި މެނޭޖިން ޑިރެކްޓަރު މަރިޔަމް ވިދާޅުވީ ހުޅުމާލެ ހޮސްޕިޓަލްގެ ގިނަ ޕްރޮޖެކްޓްގެ މަސައްކަތްތައް ކުރުމަށް އެއްބަސްވުންތަކުގައި ސޮއިކޮށްފައިވާ ކަމަށާއި، ނަމަވެސް އަމަލީ މަސައްކަތް ކޮށްފައިނުވާ ކަމަށެވެ.
ހޮސްޕިޓަލަކީ މާސްޓަރ ޕްލޭނެއް އޮވެގެން އެޕްލޭނެއްގެ ދަށުން ޑިވެލޮޕްކޮށް ހިންގަންޖެހޭ ތަނަކަށްވާއިރު، ހުޅުމާލެ ހޮސްޕިޓަލް ހިންގާފައިވަނީ އެއްވެސް ޕްލޭނެއް ނެތި ވަކި ބަޔަކަށް ނާޖާއިޒް މަންފާތަކެއް ލިބޭ ގޮތަށް ކަމަށް މަރިޔަމް ވިދާޅުވިއެވެ.
މަރިޔަމް ވިދާޅުވީ އިމާރާތް ތެރޭގައި ބައެއް އަގުބޮޑެތި އިކުޕްމެންޓްތައް އެބަހުރި ކަމަށާއި، ނަމަވެސް އެބޭނުން ނުކުރާ ކަމަށެވެ. އަދި އިކުޕްމެންޓްތައް ވެސް ގަނެފައި ހުރީ އެއްވެސް ޕްލޭނެއް ނެތި ކަމަށާއި، ފައިސާ ދައްކާފައިވާ ބައެއް އިކުޕްމެންޓްތައް ވެސް ނެތް ކަމަށެވެ.
މީގެ އިތުރުން މަރިޔަމް ވިދާޅުވީ ހޮސްޕިޓަލުގެ އެކި ތަންތަން ރީ-ޑިޒައިންކޮށްފައިވާއިރު އެތަންތަން ރީ-ޑިޒައިންކުރުމަށް ހަވާލުކޮށްފައި ހުރީ ވެސް އެމަސައްކަތް އެންމެ އެކަށީގެންވާ ކުންފުނިތަކާ ނޫން ކަމަށެވެ.
މަރިޔަމް ވިދާޅުވީ އާސަންދަ ކުންފުންޏާ ހަވާލުވެ މަސައްކަތްތައް ފަށައިގަތްއިރު، ކުންފުނީގެ ދަށުން ހިންގާ ހުޅުމާލެ ހޮސްޕިޓަލްގެ ހާލަތު ވަރަށް ދަށް ކަމަށާއި، އެންމެ އާދައިގެ ޓެސްޓްތައް ވެސް ނުހެދޭ ކަމަށެވެ. ނަމަވެސް މިހާރު ހޮސްޕިޓަލްގެ މަސައްކަތްތައް ހަރުދަނާ ކުރުމުގެ މަސައްކަތް ކުރަމުން އަންނަކަން އޭނާ ފާހަގަކުރެއްވިއެވެ.
