އޭސީސީ އަށް ހަތަރު ބޭފުޅުން އައްޔަން ކުރައްވައިފި
9 ސެޕްޓެމްބަރު 2019 | ހޯމަ 14:44އައްޔަން ކުރައްވާފައިވަނީ ހޯމަ ދުވަހު
އޭސީސީ އަށް އައްޔަން ކުރެއްވި ހަތަރު ބޭފުޅުން
އެންޓިކޮރަޕްޝަން ކޮމިޝަނުގެ މެންބަރުކަމަށް ހަތަރު ބޭފުޅަކު ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ހޯމަ ދުވަހު އައްޔަން ކުރައްވައިފިއެވެ.
އޭސީސީ އަށް އައްޔަންކުރެއްވި ބޭފުޅުންނަކީ، ފާތިމަތު އަނޫލާ, މަރްޔަމް ޝިއުނާ، އައިޝަތު ޢަބްދުﷲ އަދި އަލީ އަޝްރަފުއެވެ.
އެބޭފުޅުންގެ ތެރެއިން ފާތިމަތު އަނޫލާ ވަނީީ މޯލްޑިވްސް ކޮލެޖް އޮފް ހަޔަރ އެޑިއުކޭޝަނުން ޝަރީއާ އެންޑް ލޯގެ ފުރަތަމަ ޑިގްރީ ހާސިލުކުރައްވާފައެވެ. އޭނާ އެންމެ ފަހުން މަސައްކަތް ކުރައްވަމުން ގެންދެވީ އެސެޓް ރިކަވަރީ ކޮމިޝަންގައެެވެ.
މަރްޔަމް ޝިއުނާ އެންމެ ފަހުން އަދާކުރެއްވީ ޓްރާސްޕޭރެންސީ މޯލްޑިވްސްގެ އެގްޒެކެޓިވް ޑިރެކްޓަރުގެ މަގާމެވެ. ޝިއުނާ އަންނަނީ އިންޓަރނޭޝަނަލް ޑިވެލޮޕްމަންޓް ދާއިރާއިން ޕީއެޗްޑީއަށް ކިޔަވާ ވިދާޅުވަމުންނެވެ.
ކޮމިޝަނަށް އައްޔަން ކުރެއްވި ޢާއިޝަތު ޢަބްދުﷲ އެންމެ ފަހުން ހުންނެވީ މިނިސްޓްރީ އޮފް ފިނޭންސްގެ އޯޑިޓް އެގްޒެކެޓިވްގެ މަގާމުގައެވެ. އާއިޝަތު ވަނީ އެކައުންޓިން އެންޑް ފައިނޭންސް ދާއިރާއިން ޤައުމީ ޔުނިވަރސިޓީގައި ފުރަތަމަ ޑިގްރީ ހާސިލުކުރައްވާފައެވެ.
އޭސީސީގެ މެންބަރުކަމަށް ޢައްޔަންކުރެއްވި ޢަލީ އަޝްރަފަކީ ވިލާ ކޮލެޖުގެ ޑިރެކްޓަރ އޮފް މާރކެޓިންގެ މަގާމާއި ހިންގުމުގެ ދާއިރާގެ އެކިއެކި މަގާމުތައް ފުރުއްވާފައިވާ ބޭފުޅެކެވެ. ޢަލީ އަޝްރަފު އަންނަނީ ޔުނިވަރސިޓީ އޮފް ވެސްޓަރން އިންގްލެންޑުގެ މާސްޓަރ އޮފް ބިޒްނަސް އެޑްމިނިސްޓްރޭޝަން ފުރިހަމަ ކުރައްވަމުންނެވެ.
