ރިލްވާން މައްސަލައާއި ގުޅިގެން އަޅާ ފިޔަވަޅު މިއަދުން ފެށިގެން ފެންނަމުން ދާނެ: ރައީސް ސޯލިހު
9 ސެޕްޓެމްބަރު 2019 | ހޯމަ 09:37ތަހުގީގީ އިދާރާތަކާއި ޕީޖީއާއި އޭޖީ އާއި އެކު ރައީސް ވަނީ އިއްޔެ ބައްދަލު ކުރައްވާފައި
ރައީސް އިބްރާހިމް މުހައްމަދު ސޯލިހު
މަރާލާފައިވާ ނޫސްވެރިޔާ އަހުމަދު ރިލްވާން އަބްދުﷲ އާއި ގުޅިގެން ގެއްލުވާލާފައިވާ މީހުންނާއި މަރާލައިފައިވާ މީހުންގެ ކޮމިޝަނުން ނެރުނު ރިޕޯޓުގައި ހިމެނޭ ފަރާތްތަކާއި މެދު މިއަދުން ފެށިގެން ފިޔަވަޅު އަޅާތަން ފެންނާނެ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
މަރު ކޮމިޝަނުން ރިޕޯޓް އާންމުކުރި ފަހުން މީޑިއާ ފުރަތަމަ ފަހަރަށް ބައްދަލު ކުރައްވާ ވާހަކަދައްކަވަމުން ރައީސް ސޯލިހު ވިދާޅުވީ އެ ރިޕޯޓުގައި ހިމަނާފައިވާ ތަހުގީގާއި ގުޅިގެން ފިޔަވަޅު އަޅުއްވަން ފައްޓަވާނެ ކަމަށާއި އެކަން މިއަދުން ފެށިގެން ފެންނަމުން ދާނެކަމަށެވެ.
މަރުތައް ބަލާ ކޮމިޝަނުން ނެރުނު ރިޕޯޓާއި ގުޅިގެން އެކޮމިޝަނާއި ޕްރޮސެކިއުޓަރ ޖެނެރަލްއާއި ފުލުހުންނާއި އެޓަރނީ ޖެނެރަލްއާއި ޑިފެންސް މިނިސްޓްރީއާއެކު ބައްދަލުކުރެއްވި ކަމަށް ރައީސް ވިދާޅުވިއެވެ. އެކަމާއި ގުޅިގެން ކުރަންޖެހޭ ކަމަކީ އެކި މުއައްސަސާތަކާއި ވެސް ގުޅިފައިވާ ކަމެއް ކަމަށާއި އެކަންތައް ކުރެވެން ޖެހެނީ ހުރިހާ މުއައްސަސާތަކާއެކީ ކަމަށް ވިދާޅުވިއެވެ. އަދި މިހާރުން މިހާރަށް ކުރެވޭނެ ކަންތައްތަކާއި ގުޅިގެން މަޝްވަރާ ކުރެވުނު ކަމަށް ރައީސް ވިދާޅުވިއެވެ.
ރިލްވާން މަރާލި މައްސަލައިގައި މިހާތަނަށް ނެރުނީ ދެ ޑްރާފްޓް ކަމަށާއި ފައިނަލް ރިޕޯޓް އެމަނިކުފާނާއި ހަމައަށް ގެންނެވުމަށް ނިންމުނު ކަމަށް ރައީސް ވިދާޅުވިއެވެ.
ރައީސް ވިދާޅުވީ ރިލްވާން މައްސަލައިގައި ހައްޔަރުކުރާން ޖެހޭ މީހަކު ހައްޔަރުކޮށްގެން ވެސް އެ ތަހުގީގު ކުރިޔަށް ގެންދާނެ ކަމަށެވެ.
މިމަހުގެ 1 ވަނަ ދުވަހު މަރުތައް ބަލާ ކޮމިޝަނުން ރިލްވންގެ މައްސަލަ ތަހުގީގު ކުރުމަށްފަހު ނެރެފައިވާ ރިޕޯޓްގައި ބުނެފައިވަނީ އޭނާ މަރާލާފައިވަނީ ލޯންޗަކަށް އަރުވައިގެން ކަންނެލި ދޯންޏެއްގައި ކަރު ބުރި ކޮށްލައިގެން ކަމަށް ތަހުގީގުން ހާމަވާ ކަމަށެވެ.
ރިލްވާން މައްސަލައާއި ގުޅިގެން އަޅާ ފިޔަވަޅު މިއަދުން ފެށިގެން ފެންނަމުން ދާނެ ކަމަށް ރައީސް ސޯލިހު ވިދާޅުވިއިރު މަރުތައް ބެލި ކޮމިޝަނުން ނެރުނު ރިޕޯޓާއި ގުޅިގެން ތުހުމަތު ކުރެވޭ 15 ފަރާތެއްގެ ޕާސްޕޯޓް މިހާތަނަށް ވަނީ ހިފަހައްޓާފައެވެ. އަދި އެރިޕޯޓާއި ގުޅިގެން ބަންޑާރަނައިބުގެ އޮފީހުން ވަނީ އެކަމުގައި ތުހުމަތު ކުރެވޭ ދެ އިންޓަލިޖެންސް ފުލުހެއް ބަންދު ކުރަން ކޯޓު އަމުރަކަށް އެދުމަށް ފުލުހުންގެ ކިބައިން ބުރާސްފަތި ދުވަހު ވަނީ އެދިފައެވެ.
