ރިލްވާން މައްސަލައިގެ ތަހުގީގަށް ބައެއް ގާނޫނުތަކަށް ބަދަލު ގެންނަންޖެހޭ: ރައީސް ސޯލިހު

އަނިޔާވެރިކޮށް މަރާލާފައިވާ މިނިވަން ނޫހުގެ ނޫސްވެރިޔާ އަހުމަދު ރިލްވާންގެ މައްސަލާގެ ތަހުގީގު ކުރިއަށް ގެންދާއިރު ބައެއް ގާނޫނުތަކަށް ބަދަލު ގެންނަންޖެހޭ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.

ރިލްވާންގެ މައްސަލާގެ ތަހުގީގާ ބެހޭގޮތުން މައުލޫމާތު ދިނުމަށް ހޯމަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސް ސޯލިހު ވިދާޅުވީ މިމައްސަލަ ކުރިއަށްދާއިރު ބައެއް ގާނޫނުތަކަށް ބަދަލު ގެންނަންޖެހޭކަން ފާހަގަކުރެވިފައިވާ ކަމަށެވެ. އެގޮތުން ޓެރަރިޒަމްގެ ގާނޫނާއި، ޖިނާއީ އިޖުރާއަތުގެ ގާނޫނަށް ބަދަލު ގެންނަންޖެހޭ ކަމަށް އެމަނިކުފާނު ވިދާޅުވިއެވެ.

ޖިނާއީ އިޖުރާއަތުގެ ގާނޫނާ ބެހޭ ގޮތުން ރައީސް ސޯލިހު ވިދާޅުވީ ހައްޔަރުކުރެވޭ މީހުން ބައިތިއްބޭނެ މުއްދަތު ޖިނާއީ އިޖުރާއަތުގެ ގާނޫނުގައި އެބައޮތް ކަމަށާއި، ފުރަތަމަ ހައްޔަރުކުރުމަށްފަހު 48 ގަޑައިރު ތެރޭގައި ކޯޓަށް ހާޒިރުކުރަންޖެހޭ ކަމަށެވެ. އަދި އެންމެ ގިނަ ވެގެން ހައްޔަރުކޮށްފައި ބަހެއްޓޭނީ ވަކި މުއްދަތެއްގައިކަން ފާހަގަކުރައްވައި ރައީސް ސޯލިހު ވިދާޅުވީ މިފަދަ ބޮޑުކަމެއް ޓެރަރިޒަމްއާ ގުޅޭ އަދި ދައުލަތުގެ މަސްލަހަތާ ގުޅޭ މިފަދަ ކަމެއްގައި ހައްޔަރުކުރެވޭ މީހަކު ތަހުގީގުކޮށް ނިމި، އަދި ސަރީއަތް ނިމެންދެން އެއަށްވުރެ ގިނަ ދުވަހު ބަހައްޓަން ޖެހިދާނެ ހާލަތެއް އަތުވެދާނެ ކަމަށް ކަމަށެވެ. އެހެންކަމުން މިޖާގަ ޖިނާއީ އިޖުރާއަތުގެ ގާނޫނުގެ ތެރެއިން ފޮލިހަށްށާއި، ޕްރޮސެކިއުޓަރ ޖެނަރަލްއަށްށާއި، އަދި ކޯޓުތަކަށް ވެސް ލިބެންޖެހޭ ކަމަށް އެމަނިކުފާނު ވިދާޅުވިއެވެ.

ނޫސްވެރިޔާ އަހުމަދު ރިލްވާން ގެއްލިފައިވަނީ 2014 ވަނަ އަހަރުގެ އޮގަސްޓު މަހުގެ 8 ވަނަ ދުވަހުގައެވެ.