ނ އަތޮޅުން ފުރައިގެން މާލެ އަންނަނިކޮށް ފަރަށްއެރި ލޯންޗް އަޑިއަށް ގޮސްފި
ލޯންޗް އަޑިއަށް ގޮސްފައިވަނީ ހެނދުނު 9:45 ގައި
އެމްއެންޑީއެފުން ރޭ އެ ސަަހައްދުގައި ހަރަކާތްތެރިވަނީ
ހޮނިހިރު ދުވަހުގެ ރޭ ނ. އަތޮޅުން ފުރައިގެން މާލެ އަންނަނިކޮށް ފަރަށްއެރި "ކޮންފޯޓް އެކްސްޕްރެސް އެމްއެޗް 1" ކ. ގާފަރާއި މާލެއާއި ދެމެދަށް ކަނޑަށް އަޑިޔަށް ހިނގައްޖެއެވެ.
މީޑިއާތަކަށް މައުލޫމާތު ދެއްވަމުން އެމްއެންޑީއެފުން ބުނެފައިވަނީ އެ ލޯންޗް އަޑިޔަށް ދިޔައީ ފަރުމަތިން ފުންކޮށް އެހެން އުޅަނދެއްގެ ކަފުޖަހައިގެން ދަތުރުކުރަނިކޮށް އާދީއްތަ ދުވަހުގެ ހެނދުނު 9:45 ހާއިރު ކަމަށެވެ. އަދި އަޑިއަށް ދިޔައިރު ލޯންޗްގައި 5 މީހުން ތިބި ކަމަށާއި އެމީހުން ކަފު ޖަހައިގެން ދުއްވަމުން ދިޔަ އުޅަނދަށް އަރުވާފައިވާކަމަށް އެމްއެންޑީއެފުން ބުނެއެވެ. ލޯންޗް ފުންކުރުމުގެ މަސަތްކަތް މިހާރު އެމްއެންޑީއެފުން ދަނީ ކުރަމުންނެވެ.
ލޯންޗް ފަރަށް އެރި ހާދިސާގެ މަޢުލޫމާތު ރޭ 21:46 ހާއިރު އެމްއެންޑީއެފް ކޯސްޓްގާޑް މެރިޓައިމް ރެސްކިއު ކޯޑިނޭޝަން ސެންޓަރ (އެމްއާރުސީސީ) އަށް ލިބުމާއެކު އެމްއެންޑީއެފް މާލެ އޭރިއާ ކޯސްޓްގާޑް ސްކޮޑްރަންއިން ވަނީ ވަގުތުން ހަރަކާތްތެރިވާން ފަށާފައެވެ. މިގޮތުން ހާބަރކްރާފްޓް ލޯންޗާއި އަދި އެމްއެންޑީއެފް ކޯސްޓްގާޑް ސީ އެމްބިއުލާންސް ވަނީ އެސަރަހައްދަށް ގޮސް ފަރަށްއެރި ލޯންޗަށް އެހީތެރިކަން ފޯރުކޮށްދީފައެވެ. މި ލޯންޗުން ޖުމްލަ 38 މީހުން ދަތުރުކުރިއިރު، އޭގެ ތެރޭގައި 11 އަންހެނުންނާއި 4 ކުޑަކުދިން ވެސް ހިމެނެވެ.
އެމްއެންޑީއެފް ކޯސްޓްގާޑްގެ ސީ އެމްބިއުލާންސްގައި އެ ލޯންޗުން ދަތުރުކުރި މީހުން ރޭ ދަންވަރު 02:10 ހާއިރު ވަނީ މާލެ ގެނެސްދީފައެވެ. މިހާދިސާގައި އެއްވެސް މީހަކަށް ގެއްލުމެއް ލިބިފައި ނުވެއެވެ.
