ގަލަސަތަރާއިން ފަލްކާއޯއަށް ހޫނު މަރުހަބާއެއް!

ކޮލަމްބިއާއަށް ކުޅެމުން އަންނަ ރަޑަމެލް ފަލްކާއޯއަށް ގަލަސަތަރާއިން ހޫނު މަރުހަބާއެއް ކިޔައިފިއެވެ.

އުމުރުން 33 އަހަރުގެ ފަލްކާއޯ މޮނާކޯއާއެކު ހަދާފައިވާ އެއްބަސްވުމުގައި ބާކީ އެއް އަހަރު އޮއްވައި، ގަލަސަތަރާއިއަށް ވަނީ ބަދަލުވެފައެވެ.

ގަލަސަތަރާއިގެ ކުޅުންތެރިޔެއްގެ ގޮތުގައި ފަލްކާއޯ ދައްކާލީ ބުދަ ދުވަހު ތުރުކީގެ ޓާރކް ޓެލެކޮމް ސްޓޭޑިއަމްގައެވެ. އަދި އޭނާއަށް މަރުހަބާ ކިޔުމަށް އެތައް ހާސް ސަޕޯޓަރުންނެއް ސްޓޭޑިއަމަށް އެއްވިއެވެ.

އެޓްލެޓިކޯ މެޑްރިޑް އަދި ޕޯޓޯއަށް ވެސް ކުޅެފައިވާ ފަލްކާއޯ ވަނީ މި ދެ ކްލަބާއެކު ވެސް ބޮޑެތި ކާމިޔާބީތައް ހޯދާފައެވެ. އެގޮތުން އޭނާ ވަނީ ޕޯޓޯއާ އެކު ލީގު ތަށި، އަދި ޕޯޗުގަލް ކަޕް ދެފަހަރު ކާމިޔާބުކޮށްފައެވެ. މީގެ އިތުރުން އޭނާ ވަނީ އެޓީމާއެކު ޔޫރޮޕާ ލީގު ވެސް ކާމިޔާބުކޮށްފައެވެ.

އެޓްލެޓިކޯ މެޑްރިޑާއެކު ޔޫރޮޕާ ލީގު، ޔުއެފާ ސުޕާކަޕް އަދި ކޮޕާޑެލްރޭ ކާމިޔާބުކޮށްފައިވާ ފަލްކާއޯ ވަނީ އެންމެ ފަހުން ކުޅުނު މޮނާކޯއާއެކު ފްރެންޗް ލިގު ކާމިޔާބުކޮށްފައެވެ.

ޗެލްސީއަށް ކުޅުނު 12 މެޗުގައި އެއް ލަނޑު ކާމިޔާބުކޮށްފައިވާ ފަލްކާއޯ ވަނީ މެންޗެސްޓަރ ޔުނައިޓެޑަށް ކުޅުނު 29 މެޗުގައި ހަތަރު ލަނޑު ކާމިޔާބުކޮށްފައެވެ. އަދި އޭނާ ވަނީ އެންމެ ފަހުން ކުޅުނު މޮނާކޯގައި ހޭދަކުރި ފަސް އަހަރުގައި ކުޅުނު 139 މެޗުގައި 83 ލަނޑު ކާމިޔާބުކޮށްފައެވެ.

ކޮލަމްބިއާ ގައުމީ ޓީމާ އެކު ސައުތް އެމެރިކަން ޔޫތު ޗެމްޕިއަންޝިޕް ވެސް ކާމިޔާބުކޮށްފައިވާ ފަލްކާއޯ ވަނީ އެޓީމަށް ކުޅުނު 89 މެޗުގައި 34 ލަނޑު ކާމިޔާބުކޮށްފައެވެ.