ޕާކިސްތާން ކްރިކެޓް ޓީމުގެ ކޯޗަކަށް ކުރީގެ ކެޕްޓަން މިސްބާހު

ޕާކިސްތާން ކްރިކެޓް ޓީމުގެ ކޯޗަކަށް އެޓީމުގެ ކުރީގެ ކެޕްޓަން މިސްބާހު އަލް ހައްގު ހަމަޖައްސައިފިއެވެ.

އުމުރުން 45 އަހަރުގެ މިސްބާހު ޕާކިސްތާން ޓީމުގެ ކޯޗަކަށް ހަމަޖެއްސީ، އެޓީމުގެ ކުރީގެ ކޯޗު މިކޭ އާރތާއާއެކު ޕާކިސްތާން ކްރިކެޓް ޓީމުން ހެދި އެއްބަސްވުން އާނުކުރަން ނިންމާފައިވާ ދަނޑިވަޅެއްގައެވެ.

މިކޭ އާރތާއާއެކު ޕާކިސްތާން ކްރިކެޓް ޓީމުން ހެދި އެއްބަސްވުން އާނުކުރަން ނިންމީ ނިމުނު ކްރިކެޓް ވޯލްޑް ކަޕްގެ ސެމީން އެޓީމަށް ޖާގަ ނުލިބުމުންނެވެ.

ޕާކިސްތާން ޓީމުގެ ކޯޗަކަށް ގެނައުމަށް މިސްބާހުގެ އިތުރުން އޮސްޓްރޭލިއާގެ ކުރީގެ ބެޓްސްމޭން ޑީން ޖޯންސް އާއި ޕާކިސްތާނުގެ ކުރީގެ ކޯޗު މޮހްސިން ހާންގެ ނަންވެސް ވަނީ ޝޯޓް ލިސްޓުކޮށްފައެވެ.

ނަމަވެސް އިންޓަވިއު ކުރި މީހުންގެ ތެރެއިން ޕާކިސްތާން ކްރިކެޓް ބޯޑުން ވަނީ ކޯޗަކަށް މިސްބާހު ގެނައުމަށް ނިންމާ، އޭނާއަށް ތިން އަހަރު ދުވަހުގެ އެއްބަސްވުމެއް ދީފައެވެ.

މަގާމާ ހަވާލުވުމަށްފަހު މިސްބާހު ބުނީ، އުންމީދުތައް ހުރީ ވަރަށް މަތީގައި ކަމަށާއި، ޓީމުގެ ކަންކަމައިގެން ކުރިޔަށްދިޔުމަށް ތައްޔާރަށް ހުރި ކަމަށެވެ.

އެގޮތުން މިސްބާހު ބުނީ، ޕާކިސްތާން ޓީމުގައި މޮޅެތި ކުޅުންތެރިން ހިމެނޭ ކަމަށާއި، އެ ކުޅުންތެރިންނަށް ތަމްރީންދީ ކުރިއެރުވުމަށް މަސައްކަތް ކުރާނެ ކަމަށެވެ. އަދި މިކަމުގައި އެންމެންގެ އެއްބާރުލުން ބޭނުންވާ ކަމަށްވެސް އޭނާ ވަނީ ބުނެފައެވެ.

މިސްބާހުގެ އިރުޝާދުގެ ދަށުން ޕާކިސްތާން ޓީމު މި މަހު މެޗުތަކެއް ކުޅުމަށް ވަނީ ހަމަޖެހިފައެވެ.