އިންޑިއާ އާ އެމްބަސީގެ ބިންގާ އަޅައިފި
4 ސެޕްޓެމްބަރު 2019 | ބުދަ 13:52ބިންގާ އެޅުއްވީ ޖައިޝަންކަރު
އިންޑިއާ އެމްބަސީގެ ބިންގާ އެޅުމުގެ ރަސްމިއްޔާތުގެ ތެރެއިން
ހުޅުމާލޭގައި އަޅާ އިންޑިއާގެ އާ އެމްބަސީގެ ބިންގާ އަޅައިފި އެވެ.
ބުދަ ދުވަހު ހުޅުމާލެގައި ބޭއްވި ރަސްމިއްޔާތުގައި އިމާރާތުގެ ބިންގާ އަޅުއްވައިދެއްވީ އިންޑިއަން އޯޝަން ކޮންފަރެންސް ގައި ބައިވެރިވުމަށް ރާއްޖެވަޑައިގެން އުޅުއްވާ އެ ގައުމުގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމަނިއަން ޖައިޝަންކަރު އަދި ރާއްޖޭގެ ހާރިޖީ ވަޒީރު އަބްދުﷲ ޝާހިދުއެވެ. އެ ރަސްމިއްޔާތުގައި އިންޑިއާގެ ރާއްޖެއިން ކަނޑައަޅުއްވާފައިވާ ސަފީރު ސަންޖޭ ސުދީރްވެސް ބައިވެރިވެ ވަޑައިގެންނެވިއެވެ.
އިންޑިއާގެ އެމްބަސީ އެއް އެޅުމަށް ހުޅުމާލެ އިން ބިމެއް ދޫކޮށްފައިވަނީ އިންޑިއާގެ ކުރީގެ އެކްސްޗަރނަލް މިނިސްޓަރު މި އަހަރު މާޗް މަހު ރާއްޖެއަށް ކުރެއްވި ދަތުރުފުޅުގައެވެ.
އިންޑިއާ އެމްބަސީ އެޅުމަށް ސަރުކާރުން ބިމެއް ދީފައިވާއިރު، މިހާރު މާލޭގައި ހުރި އިންޑިއާގެ އެމްބަސީއަކީ އިންޑިއާ އިން ކުއްޔަށް ނަގައިގެން އުޅޭ ބިމެއްގައި ހަދާފައި ހުރި އިމާރާތަކެވެ. މީގެ ކުރިން ރައީސް ނަޝީދު ސަރުކާރުގައި އިންޑިއާގެ އެމްބަސީއެއް އެޅުމަށް މާލެއިން ބިމެއް ދީފައި އޮތް ނަމަވެސް އަދި މިހާތަނަށް އައި އިރު އެ ތަނުގައި އެއްވެސް އިމާރާތެއް އެޅުމަށް އެއްވެސް މަސައްކަތެއް ކޮށްފައެއް ނުވެއެވެ. ނަޝީދު ސަރުކާރުގައި އެމްބަސީ އެޅުމަށް ދީފައި ވަނީ ސޯސަން މަގުގައި ނާސަރީ ހިންގި ބިމެވެ. އެ ތަނުގައި އެމްބަސީގެ ބޯޑެއް ވެސް ހުއްޓެވެ.
