މަހުގެ ސްޓޮކް ދަމަހައްޓަން ފިޔަވަޅު އެޅުން މުހިއްމު: ރައީސް
ރާއްޖެއިން ސްޓޮކް ދަމަހައްޓަން މަސައްކަތް ކުރާނެ ކަމަށް ވިދާޅުވި
އިންޑިއަން އޯޝަން ކޮންފަރެންސް ގައި ރައީސް ސޯލިހު
އިންޑިއާ ކަނޑުގެ މަހުގެ ސްޓޮކް މަދުވުމަކީ ރާއްޖެ ކަންބޮޑުވާ ކަމެއް ކަމަށާއި އެކަމާއި މެދު އަވަސް ފިޔަވަޅެއް އަޅަން ޖެހޭ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
އަންގާރަ ދުވަހު ޕެރެޑައިސް އައިލެންޑް ރިސޯޓް ގައި ފެށި ހަތަރު ވަނަ އިންޑިއަން އޯޝަން ކޮންފަރެންސް ގައި ވާހަކަ ދައްކަވަމުން ރައީސް ސޯލިހު ވިދާޅުވީ، އެޓްލާންޓިކް ކަނޑުގެ މަހުގެ ސްޓޮކް ހަލާކުވެގެން ދިޔަ ގޮތަށް އިންޑިއާ ކަނޑުގެ މަހުގެ ސްޓޮކަށް އެގޮތް ދިމާވާ ބޭނުންނުވާ ކަމަށެވެ.
އެހެން ދިމާވެއްޖެނަމަ މި ސަރަހައްދުގެ ހުރިހާ ގައުމަކަށް އޭގެ އަސަރު ކުރާނެ ކަމަށެވެ. ރައީސް ސޯލިހު ވިދާޅުވީ، އެހެން ކަމުން އެފަދަ ގޮތެއް މެދުވެރިނުވާނެ ގޮތަށް ދެމެހެއްޓެނިވި މަސްވެރިކަން ކުރަން ރާއްޖެއިން މަސައްކަތް ކުރާނެ ކަމަށެވެ. އަދި އަވަށްޓެރި އެހެން ގައުމުތަކުންވެސް އެގޮތަށް ކަންތައް ކުރުމަށް އެމަނިކުފާނު ވަނީ ގޮވައިލައްވާފައެވެ.
ރާއްޖެއަށް ބަލާއިރު، ކަނޑަކީ ދިވެހިންގެ ލޭނާރާއި ގުޅިފައިވާ ތަނެއްކަން ފާހަގަކުރައްވަމުން ރައީސް ވިދާޅުވީ، ކަނޑުދަތުރުފަތުރުގެ ސަލާމަތާ ރައްކާތެރިކަން ކަށަވަރުކުރުމާއި، ރާއްޖޭގެ ސަރަހައްދު ހުރަސްކޮށް ދަތުރުކުރާ އުޅަނދު ފަހަރަށް ރައްކާތެރިކަމާ އެހީތެރިކަން ފޯރުކޮށްދިނުމާއި، ކަނޑުމަގުން ކުރެވޭ އެކިއެކި ވިޔަފާރިތަކަކީ ދުނިޔޭގެ ކަނޑަތަކާބެހޭ ޤާނޫނުތަކާ އެއްގޮތަށް ހިނގަމުންދާ ވިޔަފާރި ތަކެއްކަން ކަށަވަރު ކުރެވެން ޖެހޭނެ ކަމަށެވެ. އެގޮތުން ރާއްޖޭގެ ކަނޑުގެ ސަރަހައްދުގައި ކުރެވޭ އިންސާނީ ވަގުފާރިއާއި ޑްރަގްގެ ވިޔަފާރީގެ ދޮރުތައް ބަންދުކުރެވި، ދެމެހެއްޓެނިވި ނޫން ގޮތްގޮތަށާއި ގަވާއިދާ ޚިލާފަށް ކުރެވޭ މަސްވެރިކަންފަދަ ކަންކަން ހުއްޓުވުމަށް ފިޔަވަޅު އަޅަންޖެހޭކަން ރައީސް ފާހަގަކުރެއްވިއެވެ.
ޓެރަރިޒަމާއި ހައްދުފަހަނައަޅާ ދިއުމުގެ އަމަލުތަކަކީ 21 ވަނަ ގަރުނުގައި ވަރަށް އާންމުވެފައިވާ ނުރައްކާތަކެއްކަން ރައީސް ވިދާޅުވިއެވެ. ލަންކާއަށް ދިން ޓެރަރިސްޓު ހަމަލާ މިސާލެއްގެ ގޮތުން ނަންގަވައި އެމަނިކުފާނު ވިދާޅުވީ، އެފަދަ ނުރައްކާތަކުން މިންޖުވުމުގެ ގޮތުން ސަރަހައްދީ ގައުމުތަކުން އެއްގައުމު އަނެއް ގައުމަށް މައުލޫމާތު ހިއްސަކޮށް މިފަދަ ނުރައްކާތައް ނެތިކޮށްލުމަށް މަސައްކަތް ކުރަންޖެހޭކަމަށެވެ.
އިންޑިޔާ ކަނޑުގެ ގައުމުތަކުގެ ގޮތުގައި ހިމެނޭ ގިނަ ގައުމުތަކުން ބައިވެރިވާ މި ކޮންފަރެންސް ބުދަ ދުވަހާއި ހަމަޔަށް ކުރިޔަށް ގެންދިއުމަށް ހަމަޖެހިފައިވާއިރު ކޮންފަރެންސްގެ ރިޔާސަތު ބަލަހައްޓަވާނީ ސްރީލަންކާގެ ބޮޑުވަޒީރު ރަނިލް ވިކްރަމަސިންހައެވެ.
އެ ކޮންފަރެންސްގައި ބައިވެރިވެވަޑައިގަންނަވާ ބޭރުގެ ޢިއްޒަތްތެރިންގެ ތެރޭގައި އިންޑިޔާގެ ފޮރިން ސެކްރެޓަރީއާއި ސިންގަޕޫރުގެ ފޮރިން މިނިސްޓަރު ހިމެނިވަޑައިގަންނަވައެވެ. މި ބައްދަލުވުމުގައި ރާއްޖެއިން ބައިވެރިވެ ވަޑައިގަންނަވަނީ ރައްޔިތުންގެ މަޖިލީހުގެ ރައީސް، މުޙައްމަދު ނަޝީދާއި ފޮރިން މިނިސްޓަރ ޢަބުދުﷲ ޝާހިދުއެވެ.
