ޕޯޗުގަލްގެ އެންމެ މޮޅު ފުޓުބޯޅަ ކުޅުންތެރިޔާގެ މަގާމު 10 ވަނަ ފަހަރަށް ޔުވެންޓަސްއަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ހޯދައިފިއެވެ.

ފަސް ފަހަރު ދުނިޔޭގެ މޮޅު ކުޅުންތެރިޔާގެ މަގާމު ހޯދާފައިވާ ރޮނާލްޑޯ މިފަހަރު އެވޯޑު ހާސިލުކުރީ މެންޗެސްޓަރ ސިޓީގެ ބެނާޑޯ ސިލްވާ އާއި އެޓްލެޓިކޯ މެޑްރިޑްގެ ޒުވާން ފޯވާޑް ފެލިކްސްއާ ވާދަކޮށްގެންނެވެ.

އެވޯޑު ހޯދުމަށްފަހު ރޮނާލްޑޯ ބުނީ، ދުނިޔޭގައި ސޯޝަލް މީޑިއާއަށް ދެވޭ އަހައްމިއްޔަތުކަން ބޮޑު ކަމަށާއި، މި އަހަރަކީ ފަސޭހަ އަހަރެއް ނޫން ކަމަށެވެ. އަދި މިކަމުގެ ސަބަބުން އެއްވެސް މީހަކު ފަހަތަށް ނުޖެހުމަށް އޭނާ ވަނީ ބުނެފައެވެ.

އުމުރުން 34 އަހަރުގެ ރޮނާލްޑޯ މި އެވޯޑު އެންމެ ފުރަތަމަ ހާސިލުކުރީ 2007 ވަނަ އަހަރެވެ. އޭގެ ފަހުން ޖެހިގެން އައި 12 ފަހަރުގެ ތެރެއިން އޭނާއަށް އެވޯޑު ކާމިޔާބުނުވީ އެންމެ ދެ އަހަރެވެ.

މީގެކުރިން މެންޗެސްޓަރ ޔުނައިޓެޑް އަދި ރެއާލް މެޑްރިޑަށްވެސް ކުޅެފައިވާ ރޮނާލްޑޯ އަންނަނީ ޔުވެންޓަސްއަށް ބަދަލުވެ، އެ ކްލަބުގައި މޮޅު ކުޅުމެއް ދައްކަމުންނެވެ.

އެގޮތުން އޭނާ ވަނީ އެ ކްލަބަށް މިހާތަނަށް ކުޅުނު 45 މެޗުގައި 29 ލަނޑު ކާމިޔާބުކޮށްފައެވެ. އަދި އޭނާ ވަނީ އެ ކްލަބާއެކު އިޓާލިއަން ލީގާއި، އިޓާލިއަން ސުޕަ ކަޕް ކާމިޔާބުކޮށްފައެވެ.

ރޮނާލްޑޯ ވަނީ މިހާތަނަށް ޕޯޗުގަލް ޓީމަށް ކުޅުނު 158 މެޗުގައި 88 ލަނޑު ކާމިޔާބުކޮށް، އެޓީމާއެކު ނޭޝަންސް ލީގު އަދި ޔުއެފާ ޔޫރޯ އެއްފަހަރު ކާމިޔާބުކޮށްފައެވެ.