ސުޕްރީމް ކޯޓަށް ޝުޖޫނާއި، އަޒްމިރަލްދާ އައްޔަންކުރުމަށް މަޖިލީހުން ފާސްކޮށްފި
3 ސެޕްޓެމްބަރު 2019 | އަންގާރަ 09:01ރައީސް ހުށަހެެޅުއްވީ އަޒްމިރަލްދާގެ އިތުރުން އައިޝާ ޝުޖޫންގެ ނަން
އަޒްމިރަލްދާ ޒާހިރު (ކ)، ފަނޑިޔާރު އާއިޝާ ޝުޖޫން (ވ)
ޑރ. އަޒްމިރަލްދާ ޒާހިރު އަދި އައިޝާ ޝުޖޫން މުހައްމަދު ސުޕްރީމް ކޯޓުގެ ފަނޑިޔާރުކަމަށް އައްޔަން ކުރުމަށް މަޖިލީހުން ފާސް ކޮށްފިއެވެ.
އަޒްމިރަލްދާއާއި ޝުޖޫންއަށް މަޖިލީހުން ރުހުން ދީފައިވަނީ ހާޒިރުވެވަޑައިގެންނެވި 62 މެމްބަރުންގެ ވޯޓުންނެވެ. ނުފެންނަކަމަށް އެއް މެމްބަރަކު އަދި ވަކި ގޮތަކަށް އެއް މެމްބަރަކު ވޯޓު ނުދެއްވައެވެ.
ސްޕްރީމް ކޯޓުގެ ފަނޑިޔާރުކަމަށް ޝުޖޫން އަދި އަޒްމިރަލްދާ އައްޔަންކުރަން ފެންނަ ކަމަށް ޖުޑީޝަލް ސާރވިސް ކޮމިޝަނުން ނިންމާފައިވަނީ މިދިޔަ މަހުގެ 26 ވަނަ ދުވަހު އެވެ. ޖޭއެސްސީން މިގޮތަށް ނިންމެވީ ސްޕްރީމް ކޯޓުގެ ފަނޑިޔާރުކަމަށް ކުރިމަތިލެއްވި ހުރިހާ ބޭފުޅުންނާއި އިންޓަރވިއު ކުރެއްވުމަށް ފަހުގައެވެ. އަދި އެ ދެބޭފުޅުން ފަނޑިޔާރުކަމަށް އައްޔަން ކުރުމަށް ފެންނަ ކަމަށް އެ ކޮމިޝަނުން ވަނީ ރައީސް އިބްރާހިމް މުހައްމަދު ސޯލިހަށް ލަފާއަރުއްވާފަ އެވެ.
ރައީސް ސޯލިހަށް އެގޮތަށް ލަފާއެރުވުމާއެކު، ފަނޑިޔާރުކަމަށް ދެބޭފުޅުން އައްޔަންކުރުމަށް މަޖިލީހަށް ހަމަ އެ ދުވަހު ފޮނުވާފައިވެއެވެ. އަދި މައްސަލަ ދިރާސާ ކުރުމަށް މަޖިލީހުގެ ޖުޑީޝަރީ ކޮމެޓީއަށް ފޮނުވިއިރު، އެ ކޮމެޓީން ވަނީ އަޒްމިރަލްދާ އަދި ޝުޖޫނަށް ރުހުންދިނުމަށް ފެންނަ ކަމަށް ނިންމާފަ އެވެ.
ސުޕްރީމް ކޯޓުގެ ފަނޑިޔާރުންގެ އަދަދު ހަތަކަށް ބަދަލުކޮށް ކޯޓުތަކުގެ ގާނޫނަށް ގެނައި އިސްލާހު ރައީސް އިބްރާހިމް މުހައްމަދު ސޯލިހު ތަސްދީގު ކުރައްވާފައިވަނީ ޖުލައި މަހުގެ 23 ވަނަ ދުވަހުއެވެ.
އަޒްމިރަލްދާ އާއި ޝުޖޫން ސުޕްރީމް ކޯޓުގެ ފަނޑިޔާރު ކަމަށް އައްޔަންކުރުމާއެކު ވެވަޑައިގަންނަވާނީ ދިވެހިރާއްޖޭގެ ސުޕްރީމް ކޯޓަށް އައްޔަން ކުރެވޭ ފުރަތަމަ ދެ އަންހެން ފަނޑިޔާރުންނަށެވެ.
