ޓެރަރިޒަމާއި ދެކޮޅަށް ސަރަހައްދީ ފެންވަރުގައި މަސައްކަތް ކުރަންޖެހޭ: ރައީސް ސޯލިހު
2 ސެޕްޓެމްބަރު 2019 | ހޯމަ 12:46ދެ ގައުމުގެ ދެމެދުގައި ފަސް އެމްއޯޔޫއެއްގައި ވަނީ ސޮއިކުރެވިފައި
ރައީސް އިބްރާހިމް މުހައްމަދު ސޯލިހު، ބޮޑުވަޒީރު ރަނިލް ވިކްރަމަސިންހަ އާއިއެކު
ޓެރަރިޒަމާއި ހައްދުފަހަނައަޅައި ދިޔުމާއި ދެކޮޅަށް ސަރަހައްދީ ފެންވަރުގައި މަސައްކަތް ކުރެއްވުމަށް ސްރީލަންކާގެ ބޮޑުވަޒީރު ރަނިލް ވިކްރަމަސިންހަ އާއިއެކު މަޝްވަރާކުރައްވާފައިވާ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ސްރީލަންކާގެ ބޮޑުވަޒީރު ރަނިލް ވިކްރަމަސިންހަ ރާއްޖެއަށް ކުރައްވަމުން ގެންދަވާ ދަތުރުފުޅުގައި, ރައީސް އޮފީހުގައި ދެ ބޭފުޅުން އެކުގައި ވަނީ ބަޔާނެއް ދެއްވާފައެވެ. ރައީސް ސޯލިހު ވިދާޅުވީ ޓެރަރިޒަމްގެ ނުރައްކާތަކުން ދެ ޤައުމުގެ ރައްޔިތުން ސަލާމަތް ކުރުމުގެ މުހިއްމުކަމުގެ މައްޗަށް މަޝްވަރާކުރެވުނު ކަމަށެވެ. އެގޮތުން ހައްދުފަހަނައަޅައި ދިޔުމާއި ދެކޮޅަށް ސަރަހައްދީ ފެންވަރުގައާއި ދުނިޔޭގެ ފެންވަރުގައި މަސައްކަތް ކުރެއްވުމަށް މަޝްވަރާކުރެވުނު ކަމަށް އެމަނިކުފާޅު ވިދާޅުވި އެވެ.
ރައީސް ސޯލިހު ވިދާޅުވީ ދެ ޤައުމުގެ ހަމަޖެހުމަށް، އިންޑިޔާ ކަނޑުގެ ހަމަޖެހުން ވަރަށް މުހިއްމު ކަމަށާއި، އެގޮތުން މާދަމާ ރާއްޖޭގައި ފަށާ އިންޑިއަން އޯޝަން ކޮންފަރެންސަކީ މި ސަރަހައްދުގައި ސުލްހަ އާއި ހަމަޖެހުން ދަމަހައްޓަން ލިބޭ އެހީތެރި ކަމަކަށް ވެގެންދާނެ ކަމަށެވެ.
އެ މަނިކުފާނު ވިދާޅުވީ މީހުން ބިނާ ކުރުމާއި ވަސީލަތްތައް ތަރައްޤީކުރުމުގެ ދާއިރާއިން ދާއިރާއިން ރާއްޖެއަށް އެންމެ ބޮޑު އެހީތެރިކަމެއް ފޯރުކޮށްދެމުން އަންނަ އެއް ޤައުމަކީ ސްރީލަންކާ ކަމަށެވެ. ސްރީލަންކާއިން ރާއްޖެއަށް އެހީތެރިކަން ފޯރުކޮށްދެމުން އަންނަ ދާއިރާތަކަކީ ސިއްހީ ދާއިރާއާއި، ތައުލީމީ ދާއިރާއާއި، ދިފާއީ ދާއިރާގެ އިތުރުން ޒުވާނުން ތަރައްޤީކުރުމާ ގުޅޭ ދާއިރާއާއި ކުޅިވަރުގެ ދާއިރާ ކަމަށެވެ. އެކަމަށްޓަކައި އެ މަނިކުފާނު ވަނީ ސްރީލަންކާއަށް ޝުކުރު އަދާކުރައްވާފައެވެ.
ރާއްޖެއިން ލަންކާއަށް ޞިއްޙީ ޚިދުމަތް ހޯދަން ދަތުރުކުރާ ފަރާތްތަކަށް ލަންކާއިން ދޭ އެއްބާރުލުމާއި އެހީތެރިކަމަށްޓަކައި ރައީސް ސޯލިހު ވަނީ ޝުކުރު އަދާކުރައްވާފައެވެ. ގުނަވަން ބަދަލުކުރުމުގެ އޮޕަރޭޝަންތައް ކުރުމަށް ލަންކާގެ ހޮސްޕިޓަލުތަކުން ދިވެހިންނަށް ފުރުސަތު ފަހިކޮށްދިނުމަށް ލަންކާ ސަރުކާރުން ނިންމަވާފައިވާތީ އެކަން ޝުކުރުވެރިކަމާއެކު ރައީސުލްޖުމްހޫރިއްޔާ ފާހަގަކުރެއްވިއެވެ.
މީގެއިތުރުން ދެޤައުމުން އިސްކަންދޭ ބައިނަލްއަޤްވާމީ މައްސަލަތަކާމެދުވެސް ދެލީޑަރުންގެ ބައްދަލުވުމުގައި މަޝްވަރާ ކުރައްވާފައިވާ ކަމުގައި ރައީސް ސޯލިހު ވިދާޅުވިއެވެ. މިގޮތުން މޫސުމަށް އަންނަ ބަދަލުތަކުން ލިބޭ ގެއްލުންތައް ކުޑަކުރުމަށް ފިޔަވަޅުތައް އެޅުމާބެހޭގޮތުން މަޝްވަރާކުރައްވާފައިވާ ކަމަށެވެ.
މި ބައްދަލުވުމުގައި ލަންކާގެ ބޮޑު ވަޒީރު ދެއްކެވި ވާހަކަފުޅުގައި އެމަނިކުފާނު ރާއްޖެއަށް ކުރެއްވި މި ދަތުރުފުޅާއި ދަތުރުފުޅުގައި ކުރެވުނު މަޝްވަރާތަކަކީ ކާމިޔާބު މަޝްވަރާތަކެއްކަން ފާހަގަކުރެއްވިއެވެ. އަދި ދެ ޤައުމުގެ ގުޅުންތަކަކީ މާކުރިއްސުރެ ދެޤައުމުގެ ރައްޔިތުންގެ މެދުގައި ކުރިއަރަމުން ތަރައްޤީވަމުން އައިސްފައިވާ ގުޅުންތަކެއްކަން ފާހަގަކުރެއްވިއެވެ. މިހާރު ދެސަރުކާރުގެ މެދުގައި ގުޅުންތައް ޤާއިމުކުރެވިފައިވާ ދާއިރާތަކާއި އިތުރު އައު ދާއިރާތަކުން ގުޅުން ބަދަހި ކުރުމަށް މަސައްކަތްކުރައްވަމުން ގެންދަވާކަންވެސް ބޮޑުވަޒީރުގެ ވާހަކަފުޅުގައި ފާހަގަކުރެއްވިއެވެ.
ސްރީލަންކާގެ ބޮޑުވަޒީރުގެ ވާހަކަފުޅުގައި ސްރީލަންކާގައި ދިވެހީންނަށް ލިބިދޭ ޞިއްޙީ ޚިދުމަތްތަކުގެ އިތުރުން ލަންކާގެ ތަޖުރިބާއާއެކު ރައްޖޭގައި ޞިއްޙީ ޚިދުމަތް ފުޅާކޮށް މީހުން ބިނާކުރުންފަދަ ކަންކަމުގައި އެހީތެރިކަން އިތުރުކުރަން ޤަސްތުކުރައްވާކަން ފާހަގަކުރެއްވިއެވެ. ބޮޑުވަޒީރުގެ ވާހަކަފުޅުގައި ރާއްޖޭގެ ކިޔަވާކުދިންނަށް ވިސާގެ ކަންކަން ފަސޭހަކޮށްދެއްވާފައިވާކަން ފާހަގަކުރެއްވިއެވެ.
މީގެއިތުރުން މަތީ ތައުލީމުގެ ދާއިރާއިން ރާއްޖޭގެ ދަރިވަރުންނަށް ލަންކާއިން ލިބޭ ފުރުޞަތުތަކުގެ އިތުރުން ރާއްޖޭގެ މަތީ ތަޢުލީމުގެ ދާއިރާ ކުރިއެރުވުމަށް އެހީތެރިކަން ފޯރުކޮށްދިނުމާއި އިޤްތިޞާދީ ދާއިރާއާއި އިޖުތިމާޢީ ދާއިރާއިން ދެ ޤައުމުގެ ގުޅުންތައް އިތުރަށް ބަދަހިވެގެންދާނެކަން ބޮޑުވަޒީރު ފާހަގަކުރެއްވިއެވެ.
ބޮޑު ވަޒީރުގެ ވާހަކަފުޅުގައި ލަންކާއަށް މިއަހަރު ހިންގި ބޮންގޮއްވުމުގެ ހާދިސާގެ ދަތި ވަގުތުގައި ރާއްޖެއިން ދިން އެއްބާރުލުމަށް ޝުކުރުއަދާކުރެއްވިއެވެ. އަދި ޓެރަރިޒަމްފަދަ ނުރައްކާތަކަކީ ހުރިހާ ޤައުމަކަށް ވެސް އޮތް ބިރެއްކަން ބޮޑުވަޒީރު ފާހަގަކުރެއްވިއެވެ. ލަންކާގެ ބޮޑުވަޒީރު ވަނީ މޫސުމަށް އަންނަ ބަދަލުތަކަކީ ރާއްޖެއާއި ލަންކާއަށްވެސް އޭގެ ނުރައްކާ އޮތް ކަމެއްކަން ފާހަގަ ކުރައްވާފައެވެ. އެހެންކަމުން އެފަދަ ކަންކަމުގައި ރާއްޖެއަށް އެއްބާރުލުންދީ އެކުގައި މަސައްކަތް ކުރާނެކަން ބޮޑުވަޒީރު ފާހަގަކުރެއްވިއެވެ. އަދި އިންޑިއާ ކަނޑުގެ ސަލާމަތާ ރައްކާތެރިކަން ކަށަވަރުކުރުމުގައި ސަރަޙައްދުގެ ޤައުމުތައް ގުޅިގެން މަސައްކަތްކުރަން ޖެހޭކަންވެސް ބޮޑުވަޒީރު ފާހަގަކުރެއްވިއެވެ.
