ލޯންޗެއް ބަންޑުން ޖަހާލައި އަންހެނަކު ގެއްލިއްޖެ

ލޯންޗެއް ބަންޑުން ޖަހާލައިގެން ދެ އަންހެނުންނާއި ކުޑަކުއްޖަކު ގެއްލިއްޖެކަމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ބުނެފިއެވެ.

ބުރާސްފަތި ދުވަހު ހިނގި މިހާދިސާއާ ގުޅޭގޮތުން އެމްއެންޑީއެފްގެ މީޑިއާ އޮފިޝަލު ވިދާޅުވީ، ހދ ނޮޅިވަރަންފަރުން ފުރައިގެން ހދ ހަނިމާދޫއަށް ދަތުރުކުރި ކުޑަ ލޯންޗެއް ފުރި ފަހުން ޚަބަރެއް ނުވެގެން އެމްއެންޑީއެފް ނޮދަރން އޭރިއާގެ ކޯސްޓްގާރޑުން ހަރަކާތްތެރިވާން ފަށާފައިވާ ކަމަށާއި، ހާދިސާގެ ރިޕޯރޓް ލިބިފައިވަނީ ބުރާސްފަތު ދުވަހު މެންދުރު 12:25 ހާއިރު ކަމަށެވެ.

އެގޮތުން ލޯންޗު ބަންޑުން ޖަހާލާފައިވަނީ ހަނިމާދޫ ބޭރު ސަރަހައްދަކަށް ކަމަށާއި، ލޯންޗުން ދަތުރުކުރީ 10 މީހުން ކަމަށް ވެސް އެމްއެންޑީއެފުން ބުނެއެވެ. އަދި އޭގެ ތެރެއިން 7 މީހުން އެމްއެންޑީއެފް ނޮދަރން އޭރިއާ ޑިންގީގައި ހަނިމާދޫއަށް ގެންގޮސްފައިވާ ކަމަށާއި، 2 އަންހެނުންނާއި ކުޑަ ކުއްޖަކު ގެއްލިގެން ހަރަކާތްތެރިވިއިރު، އޭގެ ތެރެއިން ކުޑަކުއްޖާއާއި އަންހެނަކު ފެނިއްޖެ ކަމަށާއި، ގެއްލިފައިވާ އަންހެން މީހާ ހޯދަމުންދާ ކަމަށް އޭނާ ވިދާޅުވިއެވެ.

އެމްއެންޑީއެފް ކޯސްޓްގާރޑް ލޯންޗުން މީހުން ހޯދުމުގައި ހަރަކާތްތެރިވަމުންދާއިރު، އިތުރު ސީ އެމްބިއުލާންސެއްވެސް އެ މަސައްކަތުގައި ދަނީ ހަރަކާތްތެރި ވަމުންނެވެ. ފެނުނު އަންހެންމީހާއާ ކުޑަކުއްޖާ ހަނިމާދޫ ހޮސްޕިޓަލަށް ގެންދެވިފައިވާ ކަމަށް އޮފިޝަލް ވިދާޅުވިއެވެ.