ފަނޑިޔާރު ޑީޑީ ވަކިކުރަން މަޖިލީހަށް ހުށައަޅަން ޖޭއެސްސީން ނިންމައިފި

ސުޕްރީމް ކޯޓުގެ ފަނޑިޔާރު އަބްދުﷲ ދީދީ ވަކިކުރުމަށް މަޖިލީހަށް ފޮނުވަން ޖުޑީޝަލް ސަރވސް ކޮމިޝަން (ޖޭއެސްސީ) އިން ނިންމައިފިއެވެ.

އަންގާރަ ދުވަހު ބޭއްވެވީ ޖޭއެސްސީގެ ޖަލްސާއަށް ފަހު ނެރުނު ނޫސް ބަޔާނެއްގައި ޖޭއެސްސީއިން ބުނެފައިވަނީ، ފަނޑިޔާރު ޑީޑީ ވަކިކުރަން މަޖިލިހަށް ފޮނުވަން ނިންމީ، އެ ކޮމިޝަނުގެ ތަހުގީގު ރިޕޯޓަށް ބަދަލެއް ގެންނަން ނުފެންނާތީ ކަމަށެވެ. ޖޭއެސްސީން ވަނީ ފަނޑިޔާރު ޑީޑީގެ ތަހުގީގު ރިޕޯޓަށް ޖަވާބުދާރީ ވުމަށް ގާނޫނޫގައި ލާޒިމްކުރާ 30 ދުވަހުގެ މުއްދަތު ދީފައެވެ.

ފަނޑިޔާރު ޑީޑީ އެކޮމިޝަނަށް ލިޔުމުން ޖަވާބު ދެއްވާފައިވާ އިރު، ޖޭއެސްސީން ވަނީ އެ ޖަވާބުގައިވާ ކަންކަމަށް ބެލުމަށް ފަހު ތަހުގީގު ރިޕޯޓަށް ބަދަލެއް ގެންނާނެ ތަނެއް ނެތް ކަމަށް ނިންމާފައެވެ.

އަންގާރަ ދުވަހު ބޭއްވި މަޖިލިހުގެ ޖަލްސާގެ ހެނދުނު ދަންފަޅީގައި ވާހަކަފުޅު ދައްކަވަމުން މަޖިލީހުގެ ރައީސް މުހައްމަދު ނަޝީދު ވިދާޅުވީ، އެ ދުވަހުގެ ރޭގަނޑު އޮންނަ ޖަލްސާގައި، ފަނޑިޔާރު ޑީޑީ މަގާމުން ވަކިކުރުމުގެ މައްސަލަ ތާވަލުކުރެވިފައިވާ ކަން އިއުލާން ކުރައްވާފައެވެ.