ސުޕްރީމް ކޯޓުން މިހާތަނަށް ވެފައިވާ އެންމެ ބޮޑު އެއް ޚިޔާނާތަކީ 2013 ވަނަ އަހަރު ރައްޔިތުންލީ ވޯޓު ނިގުޅައިގަތުން ކަމަށް މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) ވިދާޅުވެއްޖެއެވެ.

ޖުޑީޝަލް ސަރވިސް ކޮމިޝަން(ޖޭއެސްސީ)އިން ވަނީ ސުޕްރީމް ކޯޓުން މިހާތަނަށް ނިންމި ގާނޫނާ ހިލާފު 17 މައްސަލަ މަޖިލީހަށް ހުށައަޅާފައެވެ. އެ މައްސަލަތަކަށް ބަހުސް ކުރުމަށް ހުޅުވާލުމުން އާދީއްތަ ދުވަހުގެ ޖަލްސާގައި ވާހަކަ ދައްކަވަމުން އިންތި ވިދާޅުވީ ރިޔާސީ އިންތިޚާބު އެތަކެއް ފަހަރު ބާތިލް ކުރަމުންގޮސް ރައްޔިތުންނަށް ލިބުނު އެންމެ ބޮޑު "އުދުވާނަކީ" މިހާތަނަށް ސުޕްރީމް ކޯޓުން ކޮށްފައިވާ އެންމެ ބޮޑު އެއް ޚިޔާނާތް ކަމަށެވެ.

އެ ރިޕޯޓަށް އިތުރަށް އިންތި ހުށައެޅުއްވި ކަންތައްތަކުގެ ތެރޭގައި ފަނޑިޔާރުގެއާއި ސުޕްރީމް ކޯޓު އިސްލާހު ކުރުމަށްޓަކާ ރައްޔިތުންނާއި ވަކީލުން ވާހަކަ ދެއްކުމުގެ ހައްގު ސުޕްރީމް ކޯޓުން ނިގުޅައިގަތް ކަމާއި ވަކީލުންގެ އިތުރުން ރައްޔިތެއް ވިއަސް ސުޕްރީމް ކޯޓުން ކުރާ ކަމަކާއި މެދު ފާޑު ކިޔާލުމުން ޖިނާއީ ދައުވާ އުފުލަމުން ދިޔަ ކަމަށެވެ. އަދި އޭނާ ވެސް އެކަމުގެ ޝިކާރައަކަށް ވެވަޑައިގެންނެވިކަމަށް އިންތި ވިދާޅުވިއެވެ.

އިންތި ވިދާޅުވީ އަވަހާރަ ކޮށްލާފައިވާ އުނގޫފާރު ދާއިރާގެ ކުރީގެ މެމްބަރު އަދި ދީނީ އިލްމުވެރިޔާ ޑރ. އަފްރާޝީމް އަލީގެ މަރުގެ ހުކުމް އައިސްފައިވާ ހުސެން ހުމާމް ނުމެރުމަށް އަފްރާޝީމްގެ ވާރިސުން އެދިފައި ވަނިކޮށް އޭނާ މެރުމަށް ހުކުމް ކުރި ކަމަށާއި އެއީ އިސްލާމީ ޝަރީއާއާއި ގާނޫނު އަސާސީއާއި ގާނޫނާއި ޚިލާފު ކަމެއްކަމަށެވެ.

ކުރީގެ އުއްތަމަ ފަނޑިޔާރު އަހުމަދު ފާއިޒު ހުސެއިން ވަނީ އެމަނިކުފާނާއި ފަނޑިޔާރު މުއުތަސިމް އަދުނާނަށް އެނގުމަކާއި ނުލައި ދެން ތިއްބެވި ފަނޑިޔާރުން ސިއްރުން ކޯޓު އަމުރެއް ނެރެފައިވާ ކަމަށް ބުނެ އޭރުގެ ރައީސަކަށް ހުންނެވި ޑރ. ވަހީދަށް ސިޓީއެއް ފޮނުއްވި ކަމަށް ވިދާޅުވެފައެވެ.

އިންތިގެ އިތުރުން އެރިޕޯޓަށް ވިލުފުށީ ދާއިރާގެ މެމްބަރު ހަސަން އަފީފު ވެސް ވަނީ ހުށައެޅުންތައް ހުށައަޅުއްވާފައެވެ.

އަފީފު ވިދާޅުވީ ސުޕްރީމް ކޯޓުން ގާނޫނު އަސާސީއާއި ފުރަތަމަ ފަހަރަށް ގާނޫނާއި ޚިލާފު ދުވަހަކީ 2008 ވަނަ އަހަރު އާ ގާނޫނު އަސާސީއާއި އެކު ވަގުތީ ގޮތުން ސުޕްރީމް ކޯޓު އުފެއްދުމުން ވަގުތީ ސުޕްރީމް ކޯޓުގައި އުއްތަމަ ފަނޑިޔާރެއް ނުހުންނާނެކަމަށް ކަނޑައެޅިގެން އުއްތަމަފަނޑިޔާރުގެ ނަންފުޅުގައި ކުރެއްވި ކަންތައްތައް ކަމަށެވެ. އެ މަސްއޫލިއްޔަތު އަވްދުﷲ ސައީދު ވަނީ އުއްތަމަ ފަނޑިޔާރުގެ ނަންފުޅުގައި ސިޓީއާއި ކަންތައްތައް ކުރެއްވި ކަމަށެވެ. އަދި އެއީ ސުޕްރީމް ކޯޓުން ގާނޫނާއި ޚިލާފަށް އަމަލު ކުރި ފުރަތަމަ ދުވަސް ކަމަށް ވިދާޅުވިއެވެ.