ދަށު ކޯޓުން ޖޭއެސްސީގައި އިންނަވާނެ ފަނޑިޔާރަކަށް އަލީ ޝަރީފް

ދަށު ކޯޓުތަކުން ޖުޑީޝަލް ސަރވިސް ކޮމިޝަން(ޖޭއެސްސީ)ގައި އިންނަވާނެ ފަނޑިޔާރަކަށް ލ. ޖުޑީޝަލް ދާއިރާގެ އިސް މެޖިސްޓްރޭޓް އަލީ ޝަރީފު ހޮވި ވަޑައިގެންފިއެވެ.

ދަށު ކޯޓުތަކުން ޖޭއެސްސީއަށް އައްޔަން ކުރާނެ ފަނޑިޔާރަކު ހޮވުމަށް ބޭއްވި އިންތިޚާބުގެ ވަގުތީ ނަތީޖާ ދައްކާގޮތުން ކުރީގައި އުޅުއްވަނީ އަލީ ޝަރީފެވެ.

ވަގުތީ ނަތީޖާ ދައްކާގޮތުން އަލީ ޝަރީފަށް ލިބިވަޑައިގެންނެވީ 127 ވޯޓެވެ. އޭނާއާއި އެކު މި އިންތިޚާބުގައި ވާދަ ކުރެއްވި ކްރިމިނަލް ކޯޓުގެ އިސްގާޒީ އަހުމަދު ހައިލަމަށް ލިބިވަޑައިގެންނެވީ 37 ވޯޓެވެ. އަދި ގދ. ފިޔޯރީ ކޯޓުގެ އިސް މެޖިސްޓްރޭޓް އަބްދުއް ރައްޒާގަށް ލިބިވަޑައިގެންނެވީ އެންމެ ވޯޓެކެވެ.

ދަށު ކޯޓުގެ ފަނޑިޔާރުންގެ ތެރެއިން ވޯޓު ލުމުގެ ހައްގު 178 ފަނޑިޔާރަކަށް ލިބިވަޑައިގަންނަވާއިރު 167 ފަނޑިޔާރަކު ވަނީ ވޯޓު ދެއްވާފައެވެ.

ޖޭއެސްސީއަށް އާންމުންގެ ތެރެއިން ކަނޑައަޅާ މެމްބަރުގެ ދައުރު ވެސް މިއަހަރު ހަމަވާތީ އެ މަގާމަށް ވެސް ތިން ބޭފުޅަކު މިހާރު ވަނީ ކުރިމަތިލައްވައިފަ އެވެ. އެއީ ޚާލިދު ޤާސިމާއި ޒުބައިރު އަހްމަދު މަނިކާއި މިރުފަތު ފާއިޒެވެ. ނަމަވެސް އެ މަގާމަށް އައްޔަން ކުރާނެ ބޭފުޅުން ކަނޑައަޅާނީ ރައްޔިތުންގެ މަޖިލީހުންނެވެ.