ޗައިނީޒް ކުޒީން ވޯލްޑް ޗެމްޕިއަންޝިޕްގައި ރާއްޖެއިން ބްރޮންޒް މެޑަލް ހޯދައިފި
މިމުބާރާތުގައި ދިވެހި 6 ޝެފުން ވަނީ ބައިވެރިވި
ޗައިނީޒް ކުޒީން ވޯލްޑް ޗެމްޕިއަންޝިޕްގައި ބައިވެރިވި ދިވެހި ޝެފުންގެ ޓީމް
އިންޓަނޭޝަނަލް ޗައިނީޒް ކުޒީން ވޯލްޑް ޗެމްޕިއަންޝިޕްގައި ރާއްޖެއިން ވާދަކޮށް ބްރޮންޒް މެޑަލް ހޯދައިފިއެވެ.
ޗައިނާގެ ޝެންޔަންގގައި ބޭއްވި މިމުބާރާތަކީ ބައިނަލްއަގްވާމީ ފެންވަރުގައި މިމަހުގެ 21 އިން 24 ވަނަ ދުވަހުގެ ނިޔަލަށް ކުރިއަށް ގެންދިޔަ މުބާރާތެކެވެ.
މިމުބާރާތުގައި ދިވެހި 6 ޝެފުން ވަނީ ބައިވެރިވެފައެވެ. އެއީ ޝެފް ގިލްޑް އޮފް މޯލްޑިވްސްގެ ފަރާތުންނެވެ.
މި މުބާރާތުގައި ބައިވެރިވެފައިވާ ދިވެހި ޝެފުންނަކީ ފާރަފުށި މޯލްޑިވްސްގެ ޝެފް މުހައްމަދު އާދިލްއާއި، ފޯރ ސީޒަންސް މޯލްޑިވްސް އެޓް ލަނޑާ ގިރާވަރުގެ ޝެފް އަޙްމަދު މާޒިމްއާއި، މަލަހިނި ކުޑަ ބަނޑޮސްގެ ޝެފް ރިއްފަތު މުހައްމަދާއި، ބަރޮސް މޯލްޑިވްސްގެ ޝެފް އިބްރާހިމް ނާތިފްއެވެ. އަދި އޮއިޝީގެ އޯނަރު އަހްމަދު ފަތީންގެ އިތުރުން ކަލިނަރީ ކޮންސަލްޓެންޓެއްކަމަށްވާ އިބްރާހިމް ނައީމްއެވެ.
ޗައިނީޒް ކުއިޒީން ވޯލްޑް ޗެމްޕިއަންޝިޕްއަކީ 2014 ވަނަ އަހަރުން ފެށިގެން ކޮންމެ ދެ އަހަރަކުން އެއް އަހަރު ބާއްވަމުން އަންނަ މުބާރާތެކެވެ. މި މުބާރާތް އިންތިޒާމްކުރަނީ ޗައިނީސް ޝެފުސް އެސޯސިއޭޝަންގެ ފަރާތުންނެވެ.
މިއީ ރާއްޖެއިން މިމުބާރާތުގައި ބައިވެރިވި ފުރަތަމަ ފަހަރު ކަމަށް ވާއިރު، މި މުބާރާތުގެ މައިގަނޑު މަގްސަދަކީ ދުނިޔޭގެ އެކި ކަންކޮޅުތަކުގައި ޗައިނާގެ ކެއުންތައް ޕްރޮމޯޓްކުރުމެވެ.
