ފިނޭންސް މިނިސްޓަރާއި މިނިވަން މުއައްސަސާތަކުގެ ރައީސުންނާއި އެކު ބައްދަލުވުމެއް ބާއްވަނީ
20 އޯގަސްޓު 2019 | އަންގާރަ 09:30އަންނަ ހަފްތާގެ ބުދަ ދުވަހު މި ބައްދަލުވުން ބޭއްވޭނެ
މިނިވަން މުއައްސަސާތަކާއި ބެހޭ ކޮމެޓީ
އަންނަ ހަފްތާގެ ބުދަ ދުވަހު ފިނޭންސް މިނިސްޓަރާއި މިނިވަން މުއައްސަސާތަކުގެ ރައީސުން ރައްޔިތުންގެ މަޖިލީހުގެ މިނިވަން މުއައްސަސާތަކާއި ބެހޭ ކޮމެޓީއަަށް ހާޒިރު ކުރުމަށް އެ ކޮމެޓީ އިން ނިންމައިފިއެވެ.
ކޮމެޓީ އިން މިގޮތަށް ނިންމާފައިވަނީ އަންގާރަ ދުވަހު ބޭއްވި މިނިވަން މުއައްސަސާތަކާއި ބެހޭ ކޮމެޓީ ބައްދަލުވުމުގައެވެ.
ކޮމެޓީގެ މުގައްރިރު ރޮޒެއިނާ އާދަމް ވާހަކަ ދައްކަވަމުން ވިދާޅުވީ, ގިނަ މިނިވަން މުއައްސަސާތަކަކުން ކޮމެޓީއަށް ހާޒިރުވެ، އެ މުއައްސަސާތަކަށް ބަޖެޓުގެ ދަތިކަން ކުރިމަތިވާ ކަން ފާހަގަކުރާ ކަމަށެވެ. އެހެންކަމުން މި މުއައްސަސާތަކުގެ ބަޖެޓުގެ ކަންބޮޑުވުންތައް ފިނޭންސް މިނިސްޓަރާއި ހިއްސާކުރުމުގެ ގޮތުން ބައްދަލުވުމެއް ބޭއްވުން މުހިއްމުކަމަށް ދެކިލައްވާ ކަމަށް ވެސް ވިދާޅުވިއެވެ. އަދި ފިނޭންސް މިނިސްޓްރީއިން ބަޖެޓުގެ މަސައްކަތްތައް ކުރިއަށް ގެންދާނެތީ، އޭގެ ކުރިން ބައްދަލުވުމެއް ބޭއްވުން މުހިއްމު ކަމަށް ވެސް ވިދާޅުވިއެވެ.
2020 ވަނަ އަހަރުގެ ބަޖެޓު އޮކްޓޯބަރު 31 ގައި ހުށަހަޅާތީ އާއި އަންނަ ސެޕްޓެމްބަރު މަހު މަޖިލިސް ޗުއްޓީއަށް ދާތީ، ކޮމެޓީގެ މެމްބަރުންނަށާއި ހާޒިރު ކުރެވޭ ފަރާތްތަކަށް ތައްޔާރު ވުމުގެ މުއްދަތެއް ދިނުމަށް ފަހު އަންނަ ހަފްތާގެ ބުދަ ދުވަހު ބައްދަލުވުން ބޭއްވުމަށް ވަނީ ނިންމާފައެވެ.
އަންގާރަ ދުވަހުގެ ކޮމެޓީގެ ބައްދަލުވުމުގައި ނިންމާފައިވަނީ އޮގަސްޓް މަހުގެ 28 ވަނަ ދުވަހު މި ބައްދަލުުވުން ބޭއްވުމަށެވެ.
