ހިޔާއާއި ފިޔަވަތީގެ 179 މުވައްޒަފަކަށް އަމާޒުކޮށް ތަމްރީނު ޕްރޮގްރާމްތަކެއް ފަށައިފި
20 އޯގަސްޓު 2019 | އަންގާރަ 07:25ކުޑަކުދިންގެ ހިޔާގެ 67 މުވައްޒަފު ބައިވެރިވި
ހިޔާއާއި ފިޔަވަތީގެ މުވައްޒަފުންނަށް އަމާޒުކޮށް ބޭއްވި ތަމްރީނުގެ ތެރެއިން
ދައުލަތުގެ ބެލުމުގެ ދަށުގައި ދިރިއުޅޭ ކުދިން ބަލަހައްޓަމުން ގެންދާ ކުޑަކުދިންގެ ހިޔާއާއި ފިޔަވަތީގެ 179 މުވައްޒަފަކަށް އަމާޒުކޮށްގެން ތަމްރީނު ޕްރޮގްރާމްތަކެއް ފަށައިފިއެވެ.
އެކަމާ ގުޅޭގޮތުން މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސްއިން ނެރުނު ބަޔާނެއްގައި ބުނީ، ކުޑަކުދިންގެ ހިޔާގެ 67 މުވައްޒަފަކާއި ފިޔަވަތިގެ 112 މުވައްޒަފުން ބައިވެރިވާ މި ޕްރޮގްރާމްގެ މަޤްޞަދަކީ މުވައްޒަފުންގެ ހުނަރުތައް ތަރައްޤީކޮށް، ދައުލަތުގެ ބެލުމުގެ ދަށުގައި ދިރިއުޅޭ ކުދިން ބަލަހައްޓަމުން ގެންދާ މަރުކަޒުތަކުން ދެވޭ ޚިދުމަތުގެ ފެންވަރު ރަނގަޅުކުރުން ކަމަށެވެ.
އެގޮތުން 3 ހަފުތާގެ މުއްދަތަށް ކުރިއަށް ގެންދާ މި ޕްރޮގްރާމް އަންގާރަ ދުވަހު ފަށާފައިވާއިރު، ޖުމުލަ 8 ދާއިރާއަކުން ސެޝަންތައް ކުރިއަށް ގެންދިޔުމަށް ހަމަޖެހިފައިވާ ކަމަށް މިނިސްޓްރީން ބުނެއެވެ.
ސެޝަންތައް ކުރިއަށްގެންދާ ދާއިރާތައް:
މިނިސްޓްރީން އިތުރަށް ބުނީ، މި ޕްރޮގްރާމްތަކުގައި މަރުކަޒުތަކުގެ ހުރިހައި ފަންތިއެއްގެ މުވައްޒަފުން ބައިވެރިވުމަށް ހަމަޖެހިފައިވާ ކަމަށާއި، ސެޝަންތައް ނަންގަވައި ދެއްވާނީ އެކަމުގެ ފަންނު ލިބިފައިވާ ފަރާތްތަކުން ކަމަށެވެ.
ދައުލަތުގެ ބެލުމުގެ ދަށުގައި މި ވަގުތު ޖުމުލަ 150 ކުދިން ދިރިއުޅެމުންދާ އިރު، މިނިސްޓްރީން ބުނީ، އޭގެ ތެރެއިން 12 އަހަރުން ދަށުގެ 106 ކުދިން ފިޔަވަތީގައި ދިރިއުޅެމުންދާ ކަމަށާއި، އަދި 12 އަހަރުން މަތީގެ 44 ކުދިން ކުޑަކުދިންގެ ހިޔާގައި ދިރިއުޅެމުންދާ ކަމަށެވެ.
ކުޑަކުދިންގެ ހިޔާގެ މުވައްޒަފުންނަށް އަމާޒުކޮށް ތަމްރީނު ޕްރޮގްރާމްތަކެއް ފަށާފައިވާއިރު، ހޯމަ ދުވަހު ކުޑަކުދިންގެ ހިޔާގެ ފަރާތުން ވަނީ ހިޔާ ހިންގުމުގައި ހުރި ދަތިތައް ރައްޔިތުންގެ މަޖިލީހުގެ އިޖުތިމާއީ ކޮމިޓީއާ ހިއްސާ ކުރައްވާފައެވެ. އެގޮތުން އެފަރާތުން ވަނީ މުވައްޒަފުންގެ ދަތިކަމާއި، މުވައްޒަފުންނަށް އެކަށީގެންވާ ތަމްރީނު ދިނުމާއި، އިމާރާތުގެ ދަތިކަމުގެ ވާހަކަ ކޮމިޓީއާ ހިއްސާ ކުރައްވާފައެވެ.
