އަމީރުލްޙައްޖު އެނބުރި ރާއްޖެ ވަޑައިގެންފި
18 އޯގަސްޓު 2019 | އާދީއްތަ 07:18އިސްލާމިކް މިނިސްޓަރ ވަނީ މަރުހަބާ ދަންނަވާފައި
އަމީރުލް ހައްޖު، ޕްލޭނިންގ މިނިސްޓަރ އަސްލަމް އެނބުރިވަޑައިގަތުން
މިއަހަރުގެ އަމީރުލްހައްޖު، މިނިސްޓަރ އޮފް ޕްލޭނިންގ އެންޑް އިންފްރާސްޓްރަކްޗަރ މުހައްމަދު އަސްލަމް ރާއްޖެވަޑައިގެންފިއެވެ.
މިއަހަރު ރާއްޖެއިން ހައްޖަށްދިޔަ މީހުންގެ އިސްވެރިއެއްގެ ގޮތުގައި މިނިސްޓަރ އަސްލަމް ވަޑައިގެންފައިވާއިރު، މިނިސްޓަރ ވަނީ ހައްޖުވެރިންނާއި، ހައްޖުވެރިންނާ ހަވާލުވެ ތިއްބެވި ގްރޫޕުތަކުގެ ވެރިންނާ ބައްދަލުކުރައްވައި ހައްޖާޖީންގެ ކަންކަން ގާތުން ބައްލަވާފައެވެ.
މިނިސްޓަރ އެނބުރި ރާއްޖެ ވަޑައިގެންފައިވާއިރު، މިނިސްޓަރ އޮފް އިސްލާމިކް އެފެއާޒް ޑރ.އަހުމަދު ޒާހިރާއި، އިސްލާމިކް މިނިސްޓްރީގެ ބައެއް އިސް ބޭފުޅުން ވަނީ މިނިސްޓަރއާއި ބައްދަލުކުރައްވައި މަރުހަބާ ވިދާޅުވެފައެވެ.
ރާއްޖެއަށް މިއަހަރު 2000 މީހުންގެ ހައްޖުކޯޓާ ލިބުނުއިރު، ރާއްޖެއިން މިފަހަރު ހައްޖަށް މީހުން ގެންގޮސްފައިވާ ގްރޫޕް ތަކަކީ މޯލްޑިވްސް ހައްޖު ކޯޕަރޭޝަން ލިމިޓެޑް، ޒަޢީ ގްރޫޕް ޕްރައިވެޓް ލިމިޓް، ތަޒްކިޔާ ޕްރައިވެޓް ލިމިޓެޑް، އަލް ހައްޖު އެންޑް އުމްރާ ކޮމްޕެނީ މޯލްޑިވްސް ޕްރައިވެޓް ލިމިޓެޑް، މިނާ ހައްޖު އުމްރާ ޕްރައިވެޓް ލިމިޓެޑް އަދި އެކްރޯ ޕްރައިވެޓް ލިމިޓެޑްއެވެ.
