ސެންޓްރަލް ޒޯން ވޮލީ މުބާރާތް: ފުރަތަމަ މެޗުގައި ރާއްޖެ ނިކުންނާނީ ކިރިގިސްތާނާ ދެކޮޅަށް
17 އޯގަސްޓު 2019 | ހޮނިހިރު 07:05މުބާރާތުގައި ރާއްޖެ ހިމެނެނީ ނޭޕާލް އާއި ކިރިގިސްތާނާއެކު އެއް ގްރޫޕެއްގައި
ގައުމީ ވޮލީ ޓީމު
އޭޝިއަން ވޮލީ ކޮންފެޑެރޭޝަން (އޭވީސީ) މެންސް ސީނިއަރ ސެންޓްރަލް ޒޯން ވޮލީ މުބާރާތުގައި ރާއްޖެ ކުޅޭ ފުރަތަމަ މެޗުގައި ކިރިގިސްތާނާ ދެކޮޅަށް ނިކުންނަން ޖެހިއްޖެއެވެ.
އަންނަ ހޯމަ ދުވަހު ނޭޕާލްގެ ވެރި ރަށް ކަތަމަންޑޫގައި ފަށާ މި މުބާރާތުގައި ކިރިގިސްތާނާ ދެކޮޅަށް ފުރަތަމަ މެޗު ރާއްޖެއިން ކުޅޭގޮތަށް ހަމަޖެހިފައިވަނީ އަންގާރަ ދުވަހުއެވެ.
ރާއްޖެއިން ކުޅޭ ދެވަނަ މެޗުގައި ބުދަ ދުވަހު ނިކުންނާނީ ނޭޕާލާ ދެކޮޅަށެވެ. ނަމަވެސް މުބާރާތުގައި ހެދި ފުރަތަމަ ޝެޑިއުލްގައި ވާގޮތުން ރާއްޖެ ފުރަތަމަ ކުޅެން އޮތީ ނޭޕާލްއާ ދެކޮޅަށެވެ. އަދި ދެވަނަ މެޗު ކުޅެން އޮތީ ކިރިގިސްތާނާ ދެކޮޅަށެވެ.
މުބާރާތުގައި ރާއްޖެ ގްރޫޕް އޭގައި ހިމެނޭއިރު، މި ގްރޫޕްގައި ރާއްޖޭގެ އިތުރުން ދެން ހިމެނެނީ ކިރިގިސްތާން އަދި ނޭޕާލެވެ.
މުބާރާތަށް ރާއްޖެއިން ވަނީ ދުރާލައި ތައްޔާރުވެފައެވެ. އެގޮތުން ޓީމު މުބާރާތަށް ނޭޕާލަށް ފުރީ ރާއްޖޭގައި ލަންކާއާ ދެކޮޅަށް ރަހުމަތްތެރިކަމުގެ ތިން މެޗު ކުޅުމަށްފަހުއެވެ.
އެ ތިން މެޗުން ރާއްޖެއިން ބަލިވިޔަސް، މެޗުތަކުގައި ރާއްޖެއިން ވަނީ މޮޅު ކުޅުމެއް ދައްކައިފައެވެ. އަދި ރާއްޖެ ޓީމުގެ ފަރާތުން ކުރިއެރުންތަކެއްވެސް ވަނީ އެ މެޗުތަކުގައި ފެނިފައެވެ.
ނިމިދިޔަ އިންޑިއަން އޯޝަން އައިލޭންޑް ގޭމްސްގައިވެސް ރާއްޖެއަށް މެޗު ތަޖުރިބާ ލިބިފައިވާއިރު، ދާދި ފަހުން ވަނީ ޔޫރަޕްގެ ގައުމެއް ކަމަށްވާ ސާބިއާގައި ތަމްރީން ދަތުރެއްވެސް ފުރިހަމަކޮށްފައެވެ.
