ފްރާންސްގެ މާސޭ އަށް ކުޅެމުން އައި އިޓަލީގެ ބަލޮޓެލީ އިޓަލީގެ ކްލަބް ބްރެޝިއާއަށް ބަދަލުވެއްޖެއެވެ.

މީޑިއާ ރިޕޯޓުތައް ބުނާގޮތުން ބަލޮޓެލީ އިޓަލީގެ ބްރެޝިއާއަށް ބަދަލުވީ ބްރެޒިލްގެ ފްލެމިންގޯއިން ހުށަހެޅި ހުށަހެޅުމަށް ފުރަގަސްދިނުމަށްފަހު އެވެ.

އިޓަލީގެ ދެވަނަ ޑިވިޝަންގެ ޗެމްޕިއަންކަން ހޯދައި ލީގަށް ކޮލިފައިވެފައިވާ ބްރެޝިއާއަކީ ބަލޮޓެލީ ނިސްބަތްވާ ސަރަހައްދުގެ ކްލަބެކެވެ.

ބްރެޝިއާއަށް ބަދަލުވުމަށްފަހު ބަލޮޓެލީ ބުނީ އޭނާ އެނބުރި ގައުމަށް އައީ އިޓަލީގެ ގައުމީ ޓީމުން ޖާގަ ހޯދުމަށް ކަމަށެވެ. މީގެ އިތުރުން ބަލޮޓެލީ ބުނީ އޭނާ އަބަދުވެސް ގައުމީ ޓީމަށް ކުޅެން ބޭނުންވާ ކަމަށާއި ގައުމީ ޓީމުން އަލުން ޖާގަ ލިބޭނެ ފެންވަރުގެ ކުޅުމެއް އޭނާ ދައްކާނެ ކަމަށެވެ.

އިންޓަ މިލާން، އޭސީ މިލާން، މެންޗެސްޓާ ސިޓީ އަދި ލިވަޕޫލަށް ވެސް ކުޅެފައިވާ ބަލޮޓެލީ ނީސް އަށް ބަދަލުވީ 2016 ވަނަ އަހަރުގެ އޯގަސްޓް މަހުގައެވެ. އޭނާ ވަނީ މިހާތަނަށް އެޓީމަށް ކުޅުނު 76 މެޗުގައި 43 ލަނޑު ކާމިޔާބުކޮށްފައެވެ.

އިންޓަ މިލާނާ އެކު ތިން ލީގުގެ ތަށި ކާމިޔާބުކޮށްފައިވާ ބަލޮޓެލީ ވަނީ އެ ކްލަބާ އެކު ޔުއެފާ ޗެމްޕިއަންސް ލީގު ވެސް ކާމިޔާބުކޮށްފައެވެ. އަދި އޭނާ ވަނީ ސިޓީއާ އެކު ޕްރިމިއާ ލީގު އަދި އެފްއޭ ކަޕް ވެސް ކާމިޔާބުކޮށްފައެވެ.

އިޓަލީއާ އެކު 2012 ވަނަ އަހަރު ޔޫރޯގެ ދެވަނަ ހޯދި ބަލޮޓެލީ ވަނީ ގައުމީ ޓީމަށް ކުޅުނު 36 މެޗުގައި 14 ލަނޑު ކާމިޔާބުކޮށްފައެވެ.

މީގެ އިތުރުން އޭނާ ވަނީ 2010 ވަނަ އަހަރުގެ ގޯލްޑެން ބޯއި އެވޯޑް އަދި 2012 ވަނަ އަހަރުގެ އިޓާލިއަން ލީގުގެ އެންމެ މޮޅު ކުޅުންތެރިޔާގެ މަގާމު ވެސް ހޯދާފައެވެ.