އިންޑިއާ އަށް ރަނގަޅު ފިލާވަޅެއް ދޭނަން: އިމްރާން ހާން
އދ. ގެ ސެކިއުރިޓީ ކައުންސިލްގެ ކުއްލި ބައްދަލުވުމަކަށް ޕާކިސްތާނުން ވަނީ އެދިފައި
ޕާކިސްތާނުގެ ބޮޑުވަޒީރު އާމިރްހާން
އިންޑިއާ އިން ކަޝްމީރުގައި ހިންގަމުންދާ ކަންތައްތަކާއި ދެކޮޅަށް އަބަދުވެސް އަޑު އުފުލާނެ ކަމަށާއި، ޕާކިސްތާނުން އިންޑިއާ އަށް ރަނގަޅު ފިލާވަޅެއް ދޭނެ ކަމަށް ވިދާޅުވެ ޕާކިސްތާނުގެ ބޮޑު ވަޒީރު އިމްރާން ހާން އިންޑިއާ އަށް އިންޒާރު ދީފި އެވެ.
އިންޑިއާގެ ގާނޫނު ހަދާ މަޖިލީހުން ކަޝްމީރަށް ލިބިފައިވާ ބައެއް އިމްތިޔާޒުތަށް ނެގުމަށް ނިންމުމާއި ގުޅިގެން އެ ސަރަހައްދުގައި އިންޑިއާ ސިފައިން ހިންގަމުންދާ ކަންތައްތަކަށް ބަދަލު ހިފުމުގެ ގޮތުން ޕާކިސްތާނު ސިފައިން އަންނަނީ ތައްޔާރުވަމުންނެވެ.
ޕާކިސްތާނުގެ ކަޝްމީރު ފަޅީގެ ވެރިރަށް މުޒައްފަރު އާބާދުގައި ބުދަ ދުވަހު ވާހަކަދައްކަވަމުން އިމްރާން ހާން ވިދާޅުވި، އިންޑިއާ އިން އުސޫލުތަކާއި ހިލާފަށް އެއްވެސް ކަމެއް ކޮށްފިނަމަ އެކަމާއި ދެކޮޅަށް އަޑު އުފުލާނެ ކަމަށެވެ. މިހާރު އިންޑިއާ އަށް ރަނގަޅު ފިލާވަޅެއް ދޭން ޖެހޭ ވަގުތު ޖެހިއްޖެ ކަމަށް ބޮޑު ވަޒީރު އިމްރާން ހާން ވިދާޅުވި އެވެ.
ބުދަ ދުވަހު ޕާކިސްތާނުގެ ފޮރިން މިނިސްޓްރީ ބުނީ، ކަޝްމީރު މައްސަލާގައި އދ.ގެ ސެކިއުރިޓީ ކައުންސިލްގައި ކުއްލި ބައްދަލުވުމެއް ބާއްވަން އެދިފައިވާ ކަމަށެވެ. އެކަމަކު އެކަމުގައި ދުނިޔޭގެ ބޮޑެތި ގައުމުތަކުން އަދިވެސް ތިބީ ހަނެވެ. ޕާކިސްތާނުގެ އަވަށްޓެރި ހުރިހާ ގައުމުތަކަކުން ވެސް އެ މައްސަލާގައި ނެގީ އިންޑިއާ ކޮޅެވެ.
ކަޝްމީރަށް ލިބިގެންވާ އިމްތިޔާޒުތައް ހަނިކުރި ހިސާބުން ފެށިގެން އެ ސަރަހައްދުގައި ފޯނުގެ ހިދުމަތާއި އިންޓަނެޓްގެ ހިދުމަތް ވަނީ ކަނޑާލާފަ އެވެ. ޕާކިސްތާނުން ތުހުމަތު ކުރާ ގޮތުން އިންޑިއާގެ އެ ނިންމުމަކީ މުސްލިމުންގެ ދަރިފަސްކޮޅު ނައްތާލުމަށް ކުރާ ކަމެއް ގޮތުގަ އެވެ.
