ރައީސް ނަޝީދު އީދު ފާހަގަކުރެއްވީ ލަންކާގައި ދިރިއުޅޭ ދިވެހިންނާއެކު!
އެމަނިކުފާނުގެ އަރިހުގައި އަނބިލަނބަލުން ލައިލާ ހަރަކާތްތަކުގައި ބައިވެރިވެވަޑައިގެންނެވި
ރައްޔިތުންގެ މަޖިލީސްގެ ރައީސް، ކުރީގެ ރައީސް މުހައްމަދު ނަޝީދު
ލަންކާގައި ދިރިއުޅޭ ދިވެހިން އީދު ފާހަގަކުރުމަށް ކުރިއަށްގެންދިޔަ ހަރަކާތްތަކުގައި ރައްޔިތުންގެ މަޖިލީސްގެ ރައީސް، ރައީސް މުހައްމަދު ނަޝީދު އާއި އަނބިކަނބަލުން ލައިލާ އަލީ ބައިވެރިވެވަޑައިގެންފި އެވެ.
ލަންކާގައި ދިރިއުޅޭ ދިވެހިން އީދު ފާހަގަކުރުމުގެ ހަރަކާތްތައް ކުރިއަށްގެންދިޔައީ ސޯސަންވިލާގަ އެވެ. ހަރަކާތްތައް ކުރިއަށްގެންގޮސްފަިއވަނީ ލަންކާގައި ހުންނަ ދިވެހި އެމްބަސީން އިސްނަގައިގެންނެވެ.
އީދު ފާހަގަކުރުމުގެ ހަރަކާތްތަކުގައި ބައިވެރިވެރިވެވަޑައިގަތުމަށް ރައީސް ނަޝީދާއި، އިނބިކަނބަލުން ލަންކާއަށް ވަޑައިގެންނެވުމުން ވަނީ އެ ދެކަނބަލުންނަށް ހޫނު މަރުހަބާއެއް ދަންނަވާފަ އެވެ. އެމަނިކުފާނު ވަނީ މި ހަރަކާތްތަކުގެ ތެރެއިން ލަންކާގައި ދިރިއުޅޭ ގިނަ ދުވެހިންނާވެސް ބައްދަލުކުރައްވާފަ އެވެ.
ލަންކާގައި ދިރިއުޅޭ ރައްޔިތުން ބުނިގޮތުގައި އީދުގެ ހަރަކާތުގައި ރައީސް ނަޝީދު ބައިވެރިވެޑައިގެންނެވުމަކީ އެތަނުގައި ދިރިއުޅޭ ދިވެހިންނަށް ލިބުނު ވަރަށް ބޮޑު އުފަލެއް ކަމަށެވެ. އަދި ދިރިއުޅުމުގެ ހާލަތު ބައްލަވާ، ދިމާވާ ދަތިތަކަކީ ކޮބައިކަމާއި، ހައްލު ހޯއްދަވައިދެއްވާނެކަމުގެ ޔަގީންކަން އެމަނިކުފާނު ދެއްވިކަމަށް އެ ރައްޔިތުން ބުންޏެވެ.
ބޭރުގެ ގައުމުތަކުގައި އީދު ކުލަގަދަކޮށް ފާހަގަކުރަމުންދާއިރު ރާއްޖޭގެ އެކި ކަންކޮޅުތަކުގައިވެސް ކުލަ ގަދަކޮށް އީދު ދަނީ ފާހަގަކުރަމުންނެވެ.
