އެމްއާރުއެމް އުފެއްދުމަށް މި ބަންދު ނިމުމުން ހުށައަޅަނީ
ދެ ވަނަ ފަހަރަށް ހުއްދައަށް އެދުނީ މެއި މަހުގެ 27 ގައި
އެމްއާރުއެމް އުފެއްދުމުގައި އިސްކޮށް އުޅުއްވާ އަލީމް(ވ) ކުރީގެ ރައީސް މައުމޫނާއި އެކު
މޯލްޑިވްސް ރިފޯމް މޫވްމަންޓް (އެމްއާރްއެމް) ރެޖިސްޓްރީކުރަން މި އީދު ބަންދު ނިމުމުން ހުށައަޅާނެ ކަމަށް އެޕާޓީ އުފެއްދުމަށް އިސްކޮށް އުޅުއްވާ އަބްދުލް އަލީމް ވިދާޅުވެއްޖެއެވެ.
އަލީމް ރާއްޖެއެމްވީއަށް ވިދާޅުވީ އެމްއާރުއެމް އުފެއްދުމަށް ބޭނުންވާ 3،000 ސައްހަ މެމްބަރުން މިހާރު ހަމަވެފައިވާ ކަމަށެވެ. އެޕާޓީ އުފެއްދުމަށް އިލެކްޝަންސް ކޮމިޝަން (އީސީ) އަށް ދިން ތާރީޚު މިމަހުގެ 27 ގައި ހަމަވާނެއެވެ.
ކުރީގެ ރައީސް މައުމޫން އަބްދުލްގައްޔޫމް އިސްވެ ހުންނަވައިގެން އުފައްދަވާ ޕާޓީ، އެމްއާރުއެމް އުފެއްދުމަށް ފުރަތަމަ ހުއްދައަށް އެދުނީ ހަޔަ އެޑިޔުކޭޝަން މިނިސްޓަރު ޑރ އިބްރާހީމް ހަސަން (ޗަބީ) ނަމުގައެވެ. އެއީ މިއަހަރުގެ ފެބްރުއަރީ މަހުގެ 19 ވަނަ ދުވަހުއެވެ. ޕާޓީ އުފެއްދުމަށް އިލެކްޝަންސް ކަމިޝަނުން ދިން މުއްދަތު ހަމަވާން ކައިރި ވެފައިވަނިކޮށް ޑރ. އިބްރާހީމް ހަސަން ވަނީ ޕާޓީ އުފެއްދުމަށް އެދުނު ހުއްދަ ބާތިލްކުރުމަށް ހުށައެޅުމަށްފަހު އެޕާޓީ އުފެދުމަށް އަލުން ހުއްދައަށް އެދިވަޑައިގެންނެވީ މިނިސްޓަރ އޮފް އަރޓްސް ކަލްޗަރ އެންޑް ހެރިޓޭޖު ޔުމްނާ މައުމޫނެވެ.
އޭގެ ފަހުން އެމްއާރުއެމްގެ ނަމުގައި ޕާޓީގެ ރެޖިސްޓްރީކުރުމުގެ ދެ ވަނަ ފަހަރަށް ހުއްދައަށް މެއި މަހުގެ 27 ގައި އެދިލެއްވީ ޔުމްނާއެވެ.
ސިޔާސީ ޕާޓީތަކުގެ ގަވައިދު ބުނާ ގޮތުން އިލެކްޝަންސް ކޮމިޝަނުގެ ދަފްތަރުގައި ރެޖިސްޓްރީ ކުރާ ނަމަ ސައްހަ 3،000 މީހުންގެ ސޮޔާއެކު ފޯމް ހުށަހަޅަންޖެހެއެވެ. އަދި އެ އަދަދު ހަމަވުމުން ޕާޓީ އުފެއްދުމުގެ ޖަލްސާ ބާއްވާ ޕާޓީގެ އިސް މަގާމުތައް ކަނޑައަޅާ މެމްބަރުން އައްޔަންކުރުމުން ޕާޓީ ރަޖިސްޓްރީ ވެގެންދާނެ ކަމަށް ގަވައިދުގައި ބުނެފައި ވެއެވެ.
ރައީސް މައުމޫން އިސްވެ ހުންނަވާ އެމްއާރުއެމް އުފެއްދުމަށް މަސައްކަތް ކުރައްވާއިރު އެޕާޓީ ވެގެންދާނީ އެމަނުކުފާނު އިސްވެ ހުންނަވާ އުފައްދަވާ ތިންވަނަ ޕާޓީއަށެވެ. އެންމެ ފުރަތަމަ ޕާޓީއެއް އުފައްދަވާފައިވަނީ 2008 ވަނަ އަހަރު ޑީއާރުޕީއެވެ. ނަމަވެސް އެޕާޓީގެ ލީޑަރ އަހުމަދު ތަސްމީނާއި، ދެމެދު އުފެދުނު ޚިޔާލު ތަފާތުވުންތަކާއެކު ޕާޓީ ދޫކުރައްވާ 2011 ވަނަ އަހަރު ޕީޕީއެމް އުފެއްދެވިއެވެ.
ޕީޕީއެމްގެ ލީޑާޝިޕްގެ މައްސަލާގައި ސްޕްރީމް ކޯޓުން މިދިޔަ ޖެނުއަރީ މަހުގެ 30 ވަނަ ދުވަހު ސްޕްރީމް ކޯޓުން ވަނީ ޕީޕީއެމްގެ ލީޑަރ ޝިޕަކީ ސައްހަ ލީޑާޝިޕެއް ކަމަށް ނިންމައި، އެ ޕާޓީ ރައީސްކަން ކުރީގެ ރައީސް ޔާމީން އަބްދުﷲ އާއި ހަވާލުކޮށްފައެވެ. އެއާއެކު އެޕާޓީން ވަކިވެވަޑައިގަތުމަށް ނިންމަވައި ރައީސް މައުމޫން ޕާޓީއަށް ފޮނުވި ސިޓީގައި ވިދާޅުވީ 2016 ވަނަ އަހަރުގެ އޮކްޓޫބަރު މަހުގެ 16 ވަނަ ދުވަހުން ފެށިގެން ޕީޕީއެމް ހިންގަމުން ގެންގޮސްފައިވަނީ އަދި މިހާރުވެސް ހިންގަމުންދަނީ ޕީޕީއެމްގެ އަސާސީ ގަވާއިދާ ކަނޑައެޅިގެން ހިލާފަށް ކަމަށެވެ.
