ވިލިމާލެ އިރުދެކުނު ފަރާތަށް ކެނޯއެއްގައި ނުކުމެގެން އުޅެނިކޮށް ގެއްލުނު ދެމީހުން ފެނިއްޖެއެވެ.

ފުލުހުން ބުނީ ގެއްލިގެން ހޯދަމުންދިއަ ދެ މީހުން ރޭ ފަތިހުގެ ވަގުތެއްގައި ހުޅުމާލެއަށް އަރާފައިވާކަމަށާއި، ދެމީހުންގެ ހާލު ވެސް ރަނގަޅު ކަމަށެވެ. އަދި ހުޅުމާލެއަށް މިދެމީހުންނަށް އެރުނީ ކެނޯ ރާޅާއި ތަޅަމުންގޮސް ހުޅުމާލޭ ސުވިމިންގ ޓްރެކާއި ދިމާއަށް ދެވުމުން ކަމަށާއި، އެ ސަރަހައްދަށް ކެނޯ ދިއުމުން އެމީހުން ފަތާފައި ހުޅުމާލެއަށް އެރީކަމަށް ފުލުހުން މައުލޫމާތުދެއެވެ.

ކެނޯގައި ނިކުމެގެން އުޅެނިކޮށް ގެއްލިގެން ހޯދަމުން ދިޔައީ 20 އަހަރުގެ ފިރިހެނަކާއި، 33 އަހަރުގެ ފިރިހެނެކެވެ. މިތަނުން އެކަކީ ފުލުހެކެވެ.

ކެނޯގައި އެމީހުން ނިކުތްފަހުން ޚަބަރެއް ނުވެގެން އެމްއެންޑީއެފް މާލެ އޭރިއާ ކޯސްޓްގާޑް ސްކޮޑްރަންގެ ފާސްޓް އިންޓަސެޕްޓް ކްރާފްޓް ވެލާނާ ލޯންޗާއި މޯލްޑިވްސް ޕޮލިސް ސަރވިސް ގުޅިގެން މަސައްކަތް ފެށީ އާދިއްތަ ދުވަހުގެ ރޭ 20:54 ހާއިރުއެވެ. ކެނޯގައި އެމީހުން ބެހިގެންދިއައީ ވިލިމާލޭ ނެރުމައްޗަށް ނިކުމެގެން އުޅެނިކޮށް ގަދަވަޔާއި އެކު އައި ކޮޅިގަނޑެއްގައި ޖެހިގެންނެވެ.

މިދުވަސްވަރަކީ މޫސުން ގޯސް ދުވަރެއްކަމުން ކަނޑުމަތީގެ ގިނަ ހާދިސާތަކެއް ދަނީ ހިނގަމުންނެވެ. އަދި މޫސުމަށް ޚާއްސަ ސަމާލުކަމެއް ދިނުމަށް ވަނީ އިލްތިމާސްކޮށްފައެވެ.