ގަނޑިޔަ ބޮޑު އީދު 1440 ގެ ހަރަކާތްތައް ފަށައިފި
މިއީ ހިންނަވަރު ކައުންސިލާއި ހޯމް މިނިސްޓްރީ އާއި ގުޅިގެން ހިންގާ ހަރަކާތެއް
ގަނޑިޔަ ބޮޑު އީދުގެ ހަރަކާތްތަށް ފެށުން
ޅ. ހިންނަވަރު ކައުންސިލާއި ހޯމް މިނިސްޓްރީ ގުޅިގެން ޅ. ހިންނަވަރުގައި މިއަހަރުގެ އަލްހާ އީދު ފާހަގަ ކުރުމުގެ ހަރަކާތްތަށް ފަށައިފިއެވެ.
ހޯމް މިނިސްޓްރީގެ ޑެޕިއުޓީ ޑިރެކްޓަރ ޖެނެރަލް އައްބާސް މުހައްމަދު ވިދާޅުވީ ހިންނަވަރު އޮތީ އީދަށް ފުރިހަމައަށް ތައްޔާރުވެފައި ކަމަށެވެ.
އައްބާސް ވިދާޅުވީ ހިންނަވަރު ކައުންސިލުންނާއި ރައްޔިތުންގެ ފަރާތުން ވަރަށް ބޮޑު އެއްބާރުލުމެއް ލިބެމުންދާ ކަމަށެވެ. އެގޮތުން އީދުގެ އެންމެ ބޮޑުއެއް ހަރަކާތް ކަމަށްވާ އީދު ބޮޑު ކެއުން ތައްޔާރު ކުރަނީ ހިންނަވަރު ކައުންސިލާއި ހިންނަވަރު ރައްޔިތުން ގުޅިގެން ކަމަށެވެ
ގަނޑިޔަ ބޮޑުއީދުގައި ހިންނަވަރުގައި ގިނަ ހަރަކާތް ތަކެއް ކުރިޔަށް ރޭވިފައި ހުރިކަމަށް އައްބާސް ވިދާޅުވިއެވެ.
އީދުގެ ހަރަކާތް ތަކަށް ހޯމް މިނިސްޓްރީއިން ކަނޑައަޅައިފައިވާ ފޯކަލް ޕޮއިންޓް އަބްދުﷲ މުޙްލިސް އާމިރު ބުނީ އީދުގެ ހަތަރުވަނަ ދުވަހާއި ހިސާބަށް ރާވަން ޖެހޭ ޕޮރޮގްރާމްތަށް ރޭވިފައި ވާކަމަށާއި އެގޮތުން ތަފާތު އެކި ކުޅިވަރުތަކާއި އީދު ސަޔާއި ސްޓޭޖް ޝޯގެ ހަރަކާތްތަށް އޮންނާނެކަމަށެވެ.
މީގެ އިތުރުން އޭނާ ބުނީ، ރަށަށް ގިނަ އަދަދެއްގެ ބަޔަކު އީދު ފާހަގަ ކުރުމަށް ގޮސްފައިވާ ކަމަށެވެ. އެގޮތުން މިހާރުވެސް ދެހާސް މީހުނަށް ވުރެ ގިނަ މީހުން ރަށަށް ގޮސްފައިވާ ކަމަށް އޭނާ ބުންޏެވެ.
ރަށުގެ އާންމު ރައްޔިތެއް ބުނީ ހިންނަވަރުގައި މިހާ ކުލަގަދަކޮށް އީދެއް މިހާތަނަށް ފާހަގަ ކޮށްފައި ނުވާކަމަށާއި މިއީ މިގޮތަށް އީދެއް ފާހަގަކުރާ ފުރަތަމަ ފަހަރުކަމަށެވެ. އެހެން ކަމުން މިއީދު ވެގެންދާނީ ރަށުގެ ތާރީހުގައި ރަން އަކުރުން ފެވޭނެ އީދެއް ކަމަށް އޭނާ ބުންޏެވެ.
ހިންނަވަރަކީ އަބަދުވެސް ކުލަގަދަކޮށް އީދު ފާހަގަ ކުރަމުން އަންނަ ރަށެކެވެ. އެގޮތުން ކޮންމެ އަހަރެއްގެ އީދުގައި ވެސް ތަފާތު ކުޅިވަރު ހަރަކާތްތަށް ރަށުގައި ބާއްވަމުން ގެންދެއެވެ.
