ޗުއްޓީއާ ދިމާކޮށް އެއާޕޯޓު ބާރުބޮޑު، ވިހާވެސް އަވަހަށް ޗެކްއިންވޭ: ވީއައިއޭ
ތިން ގަޑި އިރު ކުރިން ޗެކިންވާން އިލްތިމާސްކޮށްފައިވޭ
ވީއައިއޭ އެއާޕޯޓް
އީދު ޗުއްޓީއާ ދިމާކޮށް އެއާޕޯޓު ބާރުބޮޑުވާތީ ވީހާވެސް އަވަހަށް ޗެކިންވުމަށް ވެލާނާ އިންޓަނޭޝަނަލް އެއާޕޯޓުން އިލްތިމާސްކޮށްފި އެވެ.
ހޮނިހިރު ދުވަހު ވީއައިއޭ އިން ކޮށްފައިވާ ޓްވީޓެއްގައި ބުނީ، މި ދުވަސްވަރަކީ ގިނަ ބަޔަކު ޗުއްޓީއަށް ދުވަސްވަރަކަށް ވާތީވެ ޗެކިން ކުރުމަށް ދަތިތަކާއި ދިމާވުން އެކަށީގެންވާތީ ފްލައިޓް ފުރުމުގެ ތިން ގަޑިއިރު ކުރިން ޗެކިން ވުމަށެވެ.
ފުރުމުގެ ކުރިން ޕާސްޕޯޓުގެ މުއްދަތު ހަމަސް ދުވަހަށްވުރެ އިތުރުކަން ޗެކްކުރުމަށް އިމިގްރޭޝަނުން ވަނީ އިލްތިމާސްކޮށްފަ އެވެ. އެ އިދާރާއިން ބުނީ ރާއްޖެއިން ބޭރުގައި އުޅޭއިރު ޕާސްޕޯޓު ނުގެއްލޭނެހެން އަބަދުވެސް އަތުގައި ބޭއްވުން ބުއްދިވެރި ކަމަށެވެ. އީދު ބަންދާ ދިމާކޮށް ގިނަ ބަޔަކު ދަނީ ބޭރު ގައުމުތަކަށް ޗުއްޓީ އަށް ދަތުރުކުރަމުންނެވެ. އެގޮތުން ސްރިލަންކާ އަކީ ދިވެހިން އެންމެ ގިނައި ދަތުރުކޮށް އުޅޭ އެއް ގައުމެވެ. އީސްޓާ ހަމަލާ އަށް ފަހު އެގައުމަށް މީހުން ދިޔުން ކޮންމެވެސް ވަރަކަށް މަޑު ޖެހުނެވެ.
