އަވަށްޓެރި އިންޑިއާގެ ކެރެލާ އަށް ކުރަމުންދާ ބޯ ވިއްސާރާގައި ފެންބޮޑުވެފައި ވާތީ އެ ސަރަހައްދުގައި ދިރިއުޅޭ ދިވެހިން ސަމާލުވުމަށް ފޮރިން މިނިސްޓްރީން އިލްތިމާސް ކޮށްފި އެވެ.

ބުރާސްފަތި ދުވަހުން ފެށިގެން އިންޑިއާގެ އެކި ސްޓޭޓްތަކަށް ކުރަމުންދާ ވިއްސާރަ ގައި ކެރެލާގެ ގައި ފެންބޮޑުވުމުގެ ސަބަބުން މިހާތަނަށް 23 މީހަކު މަރުވެފައިވާ ކަމަށް ރިޕޯޓްތައް ބުނެއެވެ. ކުރިއަށް އޮތް 24 ގަޑިއިރު ތެރޭގައި ބޮޑު ސަރަހައްދަކަށް ވިއްސާރަ ކުރާނެ ކަމަށް އިންޑިއާގެ މޫސުމާއި ބެހޭ އިދާރާއިން ބުނެ އެވެ. މިހާތަނަށް 63 ހާސް މީހުން ސަލާމަތުގެ އައްސޭރި އަށް ވަނީ ގެންގޮސްފަ އެވެ. ފެނުގެ އަސަރު ކުރުމުގެ ސަބަބުން އާދިއްތަ ދުވަހާ ހަމައަށް ކޮޗިން އިންޓަނޭޝަނަލް އެއާޕޯޓް ވަނީ ވަގުތީ ގޮތުން ބަންދުކޮށްފަ އެވެ.

ކެރެލާގެ ހުރިހާ ސަރަހައްދަކަށް ރެޑް އެލާޓް ނެރެފައިވާތީ އެ ސަރަހައްދުގައި ދިރިއުޅޭ ހުރިހާ ދިވެހިން ސަމާލުވުމަށް ޓްރިވަންޑްރަމް ގައި ހުންނަ ދިވެހި ކޮންސިއުލޭޓުން ވެސް ވަނީ ހުކުރު ދުވަަހު އިލްތިމާސް ކޮށްފަ އެވެ. އެހީ އަކަށް ބޭނުންވެއްޖެ ހާލަތެއްގައި ކޮންސިއުލޭޓާ ގުޅުމަށްވެސް ވަނީ އިލްތިމާސް ކޮށްފައިވެއެވެ. ޓްރިވަންޑްރަމް އަކީ ދިވެހިންގެ ގިނަ ބަޔަކު ދިރިއުޅޭ ސަރަހައްދެކެވެ.