"ރޯޔަލް ސްޕީޑް 4" ލޯންޗް ފަރަށް އަރައިގެން އެމްއެންޑީއެފްއިން ހަރަކާތްތެރިވަނީ
މި ލޯންޗް ފަރަށް އަރާފައިވަނީ ދެކެނަންފަރު ކިޔާ ފަޅުރަށް ކައިރީ އޮތް ފަރަކަށް
ލޯންޗު ފުންކުރުމުގެ މަސައްކަތުގައި ކޯސްޓްގާޑްގެ ޑްރައިވަރުން ދަނީ ހަރަކާތްތެރިވަމުން
"ރޯޔަލް ސްޕީޑް 4" ނަމަކަށް 43 ފޫޓްގެ ލޯންޗެއް، ފަރަށް އަރައިގެން އެމްއެންޑީއެފްއިން ހަރަކާތްތެރިވާން ފަށައިފިއެވެ.
އެމްއެންޑީއެފްއިން ބުނީ މި ލޯންޗަކީ ށ. އަތޮޅުން ފުރައިގެން މާލެ ދަތުރުކުރި ލޯންޗެއް ކަމަށެވެ. މި ލޯންޗް އަރާފައިވަނީ ދެކެނަންފަރު ކިޔާ ފަޅުރަށް ކައިރީ އޮތް ފަރަކަށެވެ. އެމްއެންޑީއެފްއިން ބުނީ މި ސަރަހައްދުގައި ނޯދަން އޭރިޔާގެ ސްކްޑްރަންއިން ހަރަކާތްތެރިވަމުންދާ ކަމަށެވެ. މި ހާދިސާގެ ރިޕޯޓް ކޯސްޓް ގާޑަށް ލިބިފައިވަނީ ރޭ މެންދަމު 1.15 ގައި ކަމަށެވެ.
އެމްއެންޑީއެފްއިން ބުނީ ލޯންޗް ފުންކުރުމަށް ލޯންޗްގެ ވެރި ފަރާތާއި ގުޅިގެން އެހެން އުޅަނދެއް ހޯދުމަށް މަސައްކަތް ކުރަމުންދާ ކަމަށެވެ. ލޯންޗު ފުންކުރުމުގެ މަސައްކަތުގައި، ކޯސްޓްގާޑްގެ ޑްރައިވަރުންދަނީ ހަރަކާތްތެރިވަމުންނެވެ.
