ޗެލްސީ ދޫކޮށް ލުއިޒް އާސެނަލްއަށް ބަދަލުވެއްޖެ

ޗެލްސީ ދޫކޮށް އެ ކްލަބަށް ކުޅެމުން އަންނަ ބްރެޒިލްގެ ޑިފެންޑަރ ޑޭވިޑް ލުއިޒް އާސެނަލްއަށް ބަދަލުވެއްޖެއެވެ.

ލުއިޒް އާސެނަލްއަށް ބަދަލުވީ 8 މިލިއަން ޕައުންޑުގެ އަގަކަށް ދެ އަހަރުގެ އެއްބަސްވުމެއްގެ ދަށުންނެވެ.

ލުއިޒްއާ ބެހޭގޮތުން އާސެނަލްގެ ކޯޗު އެމެރީ ބުނީ، އޭނާއާއެކު ކްލަބުގެ ޑިފެންސްލައިން އިތުރަށް ވަރުގަދަވާނެ ކަމަށާއި، ވަރަށް ބައިވަރު ތަޖުރިބާ ލިބިގެންދާނެ ކަމަށެވެ.

ލުއިޒް އާސެނަލްއަށް ބަދަލުވެފައިވަނީ އޭނާ މިދިޔަ މެއި މަހު ޗެލްސީއާއެކު ހަދާފައިވާ އެއްބަސްވުން 2021 ވަނަ އަހަރަށް އާކޮށްފައިވަނިކޮށެވެ. އޭނާ ހޯދުމަށް ގިނަ ކްލަބްތަކުން ވަނީ މަސައްކަތް ކޮށްފައެވެ.

ބެންފީކާއަށް 132 މެޗު ކުޅެފައިވާ ޑޭވިޑް ލުއިޒު ވަނީ އެ ކްލަބާ އެކު ގިނަ ކާމިޔާބީތަކެއް ހޯދާފައެވެ. އެ އަށް ފަހު ޗެލްސީ އަށް އޭނާ ބަދަލުވިއިރު، ޗެލްސީ އަށް އޭނާ ވަނީ 143 މެޗު ކުޅެ އެ ކްލަބާއެކު ޔުއެފާ ޗެމްޕިއަންސް ލީގު އަދި ޔުއެފާ ޔޫރޮޕާ ލީގު ވެސް ކާމިޔާބު ކޮށްފައެވެ.

ޗެލްސީ ދޫކޮށް ޑޭވިޑް ލުއިޒް ޕީއެސްޖީ އަށް ބަދަލުވީ 2014 ވަނަ އަހަރުގެ ސީޒަނުގައެވެ. އޭނާ ވަނީ އެ ކްލަބަށް 89 މެޗު ކުޅެ، ފްރެންޗް ލީގު ދެފަހަރު އަދި ފްރެންޗް ކަޕް ދެފަހަރު ކާމިޔާބު ކޮށްފައެވެ.

ޕީއެސްޖީ ދޫކޮށް ޑޭވިޑް ލުއިޒް ޗެލްސީއާ އަލުން ގުޅުނީ 2016 ވަނަ އަހަރުގެ ސީޒަނުގައެވެ. އޭނާ ވަނީ މިހާތަނަށް އެޓީމަށް 105 މެޗު ކުޅެދީފައެވެ.

ބްރެޒިލް ގައުމީ ޓީމާއެކު 2013 ވަނަ އަހަރު ފީފާ ކޮންފެޑެރޭޝަންސް ކަޕް ކާމިޔާބު ކޮށްފައިވާ ޑޭވިޑް ލުއިޒް ވަނީ އެޓީމަށް 56 މެޗު ކުޅެފައެވެ.