ކަފިހިހުރަސް މަތިން 17 އަހަރުގެ ކުއްޖެއް ގައިގައި ސައިކަލަކުންޖެހި، އެމެޖެންސީގައި ފަރުވާދެނީ
މި އެކްސިޑެންޓް ހިނގާފާވަނީ ބުދަ ދުވަހުގެ ރޭ 20:14 ހާ އިރު
އެކްސިޑެންޓްގައި އަނިޔާވެ ފަރުވާދޭ އަންހެން ކުއްޖާ ކަފިހުރަސް މަތީގައި
މަޖީދީމަގުގެ ކަފިހުުރަހެއް މަތިން މަގު ހުރަސްކުރަން އުޅުނު 17 އަހަރުގެ ކުއްޖެއްގެ ގައިގައި ސައިކަލަކުން ޖެހި، އެކްސިޑެންޓުވެއްޖެ އެވެ.
ފުލުހުން ބުނީ ބުދަ ދުވަހުގެރޭ 20:14 ހާއިރު ހިނގި މި އެކްސިޑެންޓްގައި އަންހެން ކުއްޖާގެ މޭ ކަށިގަނޑަށާއި އުނަގަޑަށް އަދި ވާތު ކޮނޑަށް އަނިޔާވެފައިވާކަމަށެވެ. އަދި މެޔަށް ލިބިފައިވާ އަނިޔާގެ ސަބަބުން ކުއްޖާއަށް ނޭވާލުމަށް އުދަގޫވާކަމަށާއި، އަންހެން ކުއްޖާއަށް އޭޑީކޭ ހޮސްޕިޓަލްގެ އެމެޖެންސީގައި މިހާރު ދަނީ ފަރުވާ ދެމުންކަމަށް ފުލުހުން ބުންޏެވެ.
ފުލުހުން މައުލޫމާތުދޭ ގޮތުގައި ސައިކަލް ދުއްވަން އިނީ 35 އަހަރުގެ ދިވެހި ފިރިހެނެއް ކަމަށާއި އޭނާގެ އަތުގައި ލައިސަންސް އޮންނަކަމަށެވެ. މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
އެކްސިޑެންޓް ހިނގާ ވީޑިއޯ އިން ފެންނަގޮތުގައި އެ ކުއްޖާ ކަފިހުރަސް މައްޗަށް އަރާ މަގަށް ބަލާލާ ވަގުތުުގައި ސައިކަލުން އައިސް އެ ކުއްޖާ ގައިގަޖެހެ އެވެ. އަދި އެ ސައިކަލުގައި 35 އަހަރުގެ ދިވެހި ފިރިހެން މީހާގެ ފަހަތުގައި އަންހެނަކު އިދެ އެވެ.
އެ ވީޑިއޯއިން ފެންނަ ގޮތުގައި އެކްސިޑެންޓް ހިނގާފައިވަނީ މަޖީދީމަގު އެސްޓީއޯ ބޭސްފިހާރަ ކުރިމައްޗަށްވާގޮތަށް އޮންނަ ކަފިހުރަސް މަތިންނެވެ.
