ޝަރީއަތް ނިމެންދެން އަދީބު ޖަލު ބަންދުގައި ބަހައްޓަން ސުޕްރީމް ކޯޓުން އަމުރުކޮށްފި
8 އޯގަސްޓު 2019 | ބުރާސްފަތި 12:37ޕާސްޕޯޓް ހިފަހައްޓާފައިވަނިކޮށް އިންޑިއާ އަށް ފިއްލަވާ ވަޑައިގެންނެވި
ކުރީގެ ނައިބް ރައީސް އަހުމަދު އަދީބް
ކުރީގެ ނައިބް ރައީސް އަހުމަދު އަދީބްގެ މައްޗަށްކުރާ ދައުވާގެ ޝަރީއަތް ނިމެންދެން ޖަލު ބަންދުގައި ބަހައްޓަން ސުޕްރީމް ކޯޓުން އަމުރުކޮށްފި އެެވެ.
އަދީބާއި ގުޅޭގޮތުން މިވަގުތު ސުޕްރީމް ކޯޓުން ބަލަމުންގެންދާ މައްސަލައަކީ ޅ. މާބިންހުރާ ކުއްޔަށް ދީގެން ދައުލަތަށް ލިބެންޖެހޭ ފައިސާއަށް ޚިޔާނާތްތެރިވި މައްސަލަ އެވެ. އެ މައްސަލަ އަދީބުގެ މައްޗަށް ސާބިތުނުވާކަމަށް ހުކުމްކުރުމާއި ގުޅިގެން ދައުލަތުން އެ މައްސަލަ ސުޕްރީމް ކޯޓުގައި އިސްތިއުނާފްކުރި އެވެ.
ސުޕްރީމް ކޯޓުން ނެރުނު އަމުރުގައި ބުނެފައިވަނީ އަދީބު ކުރިން އަމަލުކުރި ގޮތުގެ މައްޗަށާއި މައްސަލައިގެ ބާވަތަށް ބެލުމަށް ފަހު، އެ މައްސަލަ އެ ކޯޓުން ނިމެންދެން ނުވަތަ އެހެން ގޮތަކަށް ކަނޑައަޅަންދެން ރިމާންޑް ޖަލެއްގައި އަދީބު ބަހައްޓަން އަމުރުކުރާ ކަމަށެވެ.
ސުޕްރީމް ކޯޓުން ޝަރީއަތް ނިމެންދެން އަދީބު ބަންދުގައި ބެހެއްޓުމަށް ކަރެކްޝަނަލް ސަރވިސްގެ މައްޗަށް އަމުރު ކުރިއިރު ކްރިމިނަލް ކޯޓުން ވެސް ވަނީ އޭނާ 15 ދުވަސް ބަންދުގައި ބަހައްޓަން އަމުރު ކޮށްފައެވެ. އެއަމުރު ކްރިމިނަލް ކޯޓުން ކޮށްފައިވަނީ ހޯމަ ދުވަހު އެވެ. ނަމަވެސް ބުރާސްފަތި ދުވަހުގެ ހަވީރުގެ ވަގުތެއްގައި ސުޕްރީމް ކޯޓުން ނެރުނު އަމުރުގައި ބުނެފައިވަނީ ޝަރީއަތް ނިމެންދެން ބަންދުގައި ބެހެއްޓުމަށް ނެރުނު އަމުރާއެކު ކްރިމިނަލް ކޯޓުގެ އަމުރަށް އަމަލުކުރަން ނުޖެހޭނެ ކަމަށެވެ.
ސުޕްރީމް ކޯޓުން އަދީބު ބަންދުގައި ބެހެއްޓުމުގެ އަމުރު ނެރުމުގެކުރިން ބުރާސްފަތި ދުވަހު އޮތް ޝަރީއަތުގެ މަޖިލީހުގައި ދައުލަތުގެ ފަރާތުން ބުނެފައިވަނީ ކްރިމިނަލް ކޯޓުގެ އަމުރުގައި ވަނީ 15 ދުވަހަށް ކަސްޓޯޑިއަލް ޖަލެއްގައި އަދީބް ބެހެއްޓުމަށް ކަމަށާއި ނަމަވެސް ޝަރީއަތް ނިމެންދެން އަދީބު ރިމާންޑް ޖަލެއްގައި ބެހެއްޓުމަށް އެދޭކަމަށެވެ. އެގޮތަށް ދައުލަތުން އެދެނީ ޝަރީއަތް ނިމެންދެން ޝަރީއަތުގެ ކުރިން ތިބެންޖެހޭނީ ރިމާންޑް ޖަލެއްގައި ކަމަށްވާތީ ކަމަށް ދައުލަތުން ބުންޏެވެ.
އަދީބުގެ ވަކީލު މުހައްމަދު އިސްމާއިލް ވިދާޅުވީ ކްރިމިނަލް ކޯޓުން އަދީބު ބަންދުކުރުމުގައި ބެހެއްޓުމުގެ އަމުރެއް ނެރިފައިވަނިކޮށް ސުޕްރީމް ކޯޓުން އަލުން ބަންދުގެ އަމުރެއް ނެރުމަކީ އޭނާއަށް ލިބިދޭ އިސްތިއުނާފުގެ މަރުހަލާއިން މަހުރޫމް ވާނެ ކަމެއް ކަމަށެވެ. އަދި ކަސްޓޯޑިއަލް ޖަލާއި ރިމާންޑް ޖަލެއްގައި އެއްވަގުތެއްގައި އެކަކަށް ހުރެވޭނީ ކިހިނެތްތޯ އޭނާ ދައުލަތާއި ސުވާލު ކުރެއްވިއެވެ.
އަދީބުގެ ވަކީލު ވަނީ އޭނާގެ ސިއްހީ ހާލަތު ގޯސްވުމުން ރާއްޖެއިން ބޭރަށް ފޮނުވާދިނުމަށާއި ގޭ ބަންދަށް ބަދަލުކުރުމަށް ހައިކޯޓުން ކުރި އަމުރަށް ސުޕްރީމް ކޯޓުން ތާއިދުކޮށްފައިވާކަން ފާހަގަކުރައްވާފަ އެވެ. އެހެންކަމުން އެއަމުރާއި އެއްގޮތަށް އަދީބު ގޭބަންދަށް ބަދަލު ކުރުމަށް އެދިލައްވާފައެވެ.
ދައުލަތުގެ ފަރާތުން ބުނީ އަދީބުގެ ޕާސްޕޯޓް ހިފަހައްޓާފައިވަނިކޮށް އޭނާ ރާއްޖެއިން ފިލުމުން އޭނާގެ ނިޔަތަކީ ފިލުންކަމަށް އެނގޭ ކަމަށެވެ. ހައިކޯޓުގެ ނިންމުމަށް ސުޕްރީމް ކޯޓުން ތާއީދު ކުރި ނަމަވެސް އެ ހުކުމަކީ އެހެން ކަމެއްގައި ކޮށްފައިވާ ހުކުމެއްކަން ދައުލަތުން ފާޙަގަކުރި އެވެ. އަދި ސުޕްރީމް ކޯޓުގެ އެނިންމުމަށް މި މައްސަލައަށް އަސަރު ނުކުރާ ކަމަށް ބުނެފައިވެއެވެ. ކަރެކްޝަނަލް ސަރވިސް އިން މީގެ ކުރިން ވެސް އަދީބު ބޭސްފަރުވާއަށް ގެންގޮސްފައިވާ ކަމަށާއި އަދި މިހާލަތުގައި ވެސް އަދީބަށް އޭގެ ދަށުން ބޭސްފަރުވާ ކުރެވޭނެ ކަމަށް ދައުލަތުން ފާހަގަ ކޮށްފައިވެއެވެ.
މި މައްސަލަ ބެއްލެވީ އުއްތަމަ ފަނޑިޔާރު ޑރ. އަޙްމަދު ޢަބްދުﷲ، ފަނޑިޔާރު ޢަބްދުﷲ ޢަރީފް، ފަނޑިޔާރު ޢަބްދުލްޣަނީ މުޙައްމަދެވެ.
