"ވިލި އީދު އުފާ"ގެ ނަމުގައި ވިލިމާލޭގައި ކުލަގަދަކޮށް އީދު ފާހަގަ ކުރަނީ
މިއީ ވިލިމާލޭ ރައްޔިތުން އިސްނަގައިގެން ކުރިޔަށް ގެންދާ ހަރަކާތެއް
ވިލި އީދު އުފާ
ވިލިމާލޭ ރައްޔިތުން އިސްނަގައިގެން ވިލިމާލޭގެ މުއައްސަސާތަކާއި ގުޅިގެން "ވިލި އީދު އުފާ"ގެ ނަމުގައި ވިލިމާލޭގައި ކުލަގަދަކޮށް އީދު ފާހަގަ ކުރަން ނިންމައިފިއެވެ.
"ވިލި އިދު އުފާ"ގެ އިވެންޓް ކޯޑިނޭޓަރ ނާޝިޔާ މުހައްމަދު ސަލީމް ބުނީ ވިލިމާލޭ ރައްޔިތުން އިސްނަގައިގެން ކުލަ ގަދަކޮށް މި އަހަރުގެ ބޮޑު އީދު ފާހަގަ ކުރަން ނިންމައިފައިވާ ކަމަށެވެ. އެގޮތުން އީދުގެ ފުރަތަމަ ދުވަހު އީދު ނަމާދަށް ފަހު ރަށުގެ ބޮޑު މަގުގައި އީދު ބޮޑު ސައިގެ ނަމުގައި ރައްޔިތުން ތައްޔާރުކުރާ ބޮޑު ސައި އޮންނާނެ ކަމަށެވެ. އޭގެ އިތުރުން އީދު ސަލާމް ކުރުންވެސް އޮންނާނެ ކަމަށް އޭނާ ބުންޔެވެ.
ނާޝިޔާ ބުނީ އީދު ސަލާމް އަދި އީދު ސައި ކުރިޔަށް ގެންދަނީ ވިލިމާލޭ ރައްޔިތުންނާއި، ޕީސް ފައުންޑޭޝަނާއި، މިނިސްޓްރީ އޮފް ޔޫތް، ސްޕޯޓްސް އެންޑް ކޮމިއުނިޓީ އެމްޕަވަރމެންޓް އަދި މިނިސްޓްރީ އޮފް އިސްލާމިކް އެފެއާޒް އާއި ގުޅިގެން ކަމަށެވެ.
މީގެ އިތުރުން މި އީދުގައި އެރަށުގައި ފެންކުޅި ކުޅުމާއި، ބީޗް ކުޅިވަރުގެ ހަރަކާތްތައް ކުރިޔަށް ދާނެ ކަމަށްވެސް ނާޝިޔާ ބުންޏެވެ. އޭގެ އިތުރުން ކުޑަކުދިންގެ ހަވީރަކާއި މާލި ޕެރޭޑާއި މިޔުޒިކް ޝޯއެއްގެ އިތުރުން ބޯޑު މަހުގެ ހަރަކާތްތައް ކުރިޔަށް ދާނެކަމަށްވެސް އެފަރާތުން ބުންޏެވެ.
ވިލިމާލޭގައި އީދު ހަރަކާތް ކުރިޔަށް ދާނީ ރަށުގެ ރައްޔިތުން އިސްނަގައިގެން ސަރުކާރުގެ މުއައްސަސާތަކާއި ގުޅިގެން ފާހަގަ ކުރާ ހަރަކާތްތަކެއްގެ ގޮތުގަ އެވެ.
