ތަހުގީގު އިދާރާތައް ބޭނުންވެއްޖެ މައުލޫމާތެއް ބޭންކުން ހޯދުމަށް ކޯޓު އަމުރެއް ބޭނުން ނުވޭ: ސިވި ކޯޓު
ތަހުގީގީ އިދާރާތަކަށް ބީއެމްއެލްއިން މައުލޫމާތު ފޯރުކޮށްދިނުން ހުއްޓާލީ ޖުލައި 7 އިން ފެށިގެން
ސިވިލް ކޯޓު ހިންގަމުން އަންނަ ޖަސްޓިސް ބިލްޑިން
ކޮރަޕްޝަންގެ މައްސަލަތައް ބަލަން އުފައްދާފައިވާ ޕްރެޒިޑެންޝަލް ކޮމިޝަން އޮން ކޮރަޕްޝަން އެންޑް އެސެޓް ރިކަވަރީ ކޮމިޝަނާއި އެހެނިހެން ތަހުގީގީ އިދާރާއިން ބޭންކުގެ މައުލޫމާތެއް ލިޔުމުން ދޭން އެދިއްޖެނަމަ ކޯޓު އަމުރަކާނުލާ އެމައުލޫމާތު ފޯރުކޮށްދޭން ޖެހޭނެ ކަމަށް ސިވިލް ކޯޓުން އަމުރު ކޮށްފިއެވެ.
ބޭންކް އޮފް މޯލްޑިވްސް(ބީއެމްއެލް)އިން އެސެޓް ރިކަވަރީ ކޮމިޝަނާއި ދެކޮޅަށް ހުށަހެޅި މައްސަލައިގައި ސިވިލް ކޯޓުގައި އެދިފައިވަނީ އެ ކޮމިޝަނުން އެދޭ މައުލޫމާތުތައް ކޯޓު އަމުރެއް ނެތި ފޯރުކޮށްދެވެން ނެތް ކަމަށް ކަނޑައެޅުމަށެވެ.
މީގެ ކުރިން ތަހުގީގު އިދާރާތަކަށް ބީއެމްއެލުން އެއްބާރުލުން ދިން ނަމަވެސް ޖުލައި 7 ވަނަ ދުވަހުން ފެށިގެން ބޭންކުން ވަނީ ތަހުގީގީ އިދާރާތަކުން ބޭނުންވާ މައުލޫމާތު ދެވޭނީ ކޯޓު އަމުރެއްގެ ދަށުން ކަމަށް ނިންމާފައެވެ. ބީއެމްއެލުން ބުނީ މައުލޫމާތު ނުދިނުމަށް ކަނޑައެޅީ ޖިނާއީ އިޖުރާއަތުގެ ގާނޫނުގެ 72 ވަނަ މާއްދާގެ (ބ) އާއި ހައިކޯޓުން މިއަހަރު ނެރެފައިވާ ގަޒިއްޔާއަކާއި ހަވާލާދީ ކަމަށް އެބޭންކުން ވަނީ ބުނެފައެވެ.
އެކަމާއި ގުޅިގެން ސިވިލް ކޯޓުން ބުދަ ދުވަހު ނެރުނު އަމުރުގައި ބުނެފައިވަނީ ބޭންކިން ގާނޫނުގައި މައުލޫމާތު ދިނުމުގައި އަމަލު ކުރަން ޖެހޭ ގޮތްތައް ބަޔާން ކޮށްފައިވާ ކަމަށެވެ. އަދި ޖިނާއީ އިޖުރާއަތުގެ ގާނޫނުގެ 72 ވަނަ މާއްދާގެ (ބ)ގައި ބޭންކިން ގާނޫނުގެ މާއްދާއާ އެއްގޮތްވާ ގޮތުގެ މަތިން، ޖިނާއީ ކުށްތައް ތަހުގީގުކުރުމުގެ ގާނޫނީ ބާރު ލިބިފައިވާ ފަރާތަކުން ލިޔުމަކުން އެދިގެން، ބޭންކުގެ ކަސްޓަމަރުންގެ އެކައުންޓްތަކާއި، ޑިޕޮސިޓްތަކާއި، ޓްރަސްޓްތަކާއި، ސޭފް ޑިޕޮސިޓް ބޮކްސްތަކުގެ މައުލޫމާތުތައް ހޯދުމަކަށް ހުރަސް ނާޅާ ކަމަށް އެހުކުމުގައި ބުނެފައި ވެއެވެ. އެހެންކަމުން ބީއެމްއެލްއިން މައްސަލާގައި އެދުނު ގޮތަށް ކޯޓު އަމުރެއް ނެތީސް މައުލޫމާތު ފޯރުކޮށްދެވެން ނެތް ކަމަށް ކަނޑައަޅައި އެކަން ކޮމިޝަނަށް އެންގޭނެ ގާނޫނީ އެއްވެސް ހަމައެއް ނެތް ކަމަށާއި ގާނޫނުގައި ބުނާ ގޮތަށް ކޮމިޝަނުން ލިޔުން އަންގާ މައުލޫމާތުތަކަކީ ބޭންކުން ގާނޫނީ ގޮތުން ދޭން ލާޒިމް ވާނެ މައުލޫމާތުތަކެއް ކަމަށް އެ ހުކުމްގައި ވެއެވެ.
.ބޭންކިން ގާނޫނުގެ 41 ވަނަ މާއްދާގައިވާ ގޮތުން ޖިނާއީ ކުށްތައް ތަހްގީގުކުރުމުގެ ގާނޫނީ ބާރު ލިބިފައިވާ ފަރާތަކުން ލިޔުމަކުން އެދިއްޖެ ހިނދެއްގައި އެ މައުލޫމާތެއް ފޯރުކޮށްދޭން ޖެހޭނެ އެވެ.
