އަޟްހާ އީދު ދުވަހު އިންޖީނުލީ އެއްގަމު އުޅަނދު ދުއްވުން މާލެ ސިޓީ ކައުންސިލުން މަނާކޮށްފިއެވެ.

އެ ކައުންސިލުން ނެރުނު އިއުލާނެއްގައި ބުނީ އޮގަސްޓް 11 ވަނަ ދުވަހުގެ ހަވީރު 04:30 އިން ފެށިގެން 06:30 އަށް މާލެސިޓީ އަދި ވިލިމާލޭގައި އިންޖީނުލީ އެއްގަމު އުޅަނދު ދުއްވުން މަނާކަމެއް ކަމަށެވެ. ސަލާމަތީ ބާރުތަކުން ބޭނުންކުރާ އިންޖީނުލީ އެއްގަމު އުޅަނދާއި، އެމްބިއުލެންސް، އާ ފުރާ މީހުން ބޭނުންކުރުމަށް ހުއްދަ ދެވޭ އުޅަނދާއި، ހާއްސަ އެހީއަށް ބޭނުންވާ މީހުން ދުއްވުމަށް ހާއްސަ ކުރެވިފައިވާ އުޅަނދުތަކާއި، ޕަބްލިކް ޓްރާންސްޕޯޓުގެ ގޮތުގައި ދެމުން ގެންދާ ބަހުގެ ހިދުމަތުގެ އިތުރުން އެ ގަޑިތަކުގައި ދުއްވުމުގެ ހުއްދަ ދެވޭ އުޅަނދުތައް ފިޔަވައި އިތުރު އިންޖީނުލީ އުޅަނދެއް ދުއްވުމަކީ މަނާކަމެއް ކަމަށް އިއުލާނުގައިވެއެވެ.

މާލެސިޓީ ކައުންސިލުން އިތުރަށް ބުނީ އެގޮތަށް ހަމަޖެއްސީ މާލެސިޓީ އަކީ ގިނަ އަދަދެއްގެ ރައްޔިތުން ދިރިއުޅެމުންދާ، ކާރުބާރު ބޮޑު ތޮއްޖެހިފައިވާ ސިޓީއަކަށްވެފައި ހިތްހަމަޖެހިގެން އުފާފާޅުކުރުމުގެ ގޮތުން މަގުމައްޗަށް ނިކުމެ ހިނގާބިގާވެ އުޅުމަށް މީގެ ކުރިން ވެސް އެކި މުނާސަބަތުތަކުގައި ހަމަޖައްސާފައިވާތީ ކަމަށެވެ.

އެންގުމާއި ހިލާފުވާ ފަރާތްތަކާމެދު ޤާނޫނުގެ ތެރެއިން ފިޔަވަޅު އަޅާނެ ކަމަށް ވެސް މާލެސިޓީ ކައުންސިލުން ބުންޏެވެ.

އެ ކައުންސިލުން ދާދި ފަހުން ވަނީ ރާއްޖޭގެ 54 ވަނަ މިނިވަން ދުވަސް ފާހަގަކުރުމުގެ ގޮތުން ހިންގޭ ހަރަކާތްތަކާއި ގުޅިގެންނާއި އަތުގުޅާލުމުގެ ހަރަކާތާއި ގުޅިގެން ވެސް މާލެސިޓީގެ ބައެއް މަގުތަކުގައި އެއްގަމު އުޅަނދު ދުއްވުން ވަކި ގަޑިއެއްގައި މަނާކޮށްފައެވެ.