ރައީސް ނަޝީދު ހައްޔަރު ކުރި ދުވަސްވަރު ބޭންކުގެ ތެރެއިން ފައިސާގެ ބޮޑެތި މުއާމަލާތްތައް ހިނގި
މޭޑޭ ދުވަސްވަރު އެކަންތައް ހިނގާފައިވަނީ
އެފްއައިޔޫގެ ކުރީގެ ހެޑް އާތިފް ޝަކޫރު
ކުރީގެ ރައީސް މުހައްމަދު ނަޝީދު އާއި ކުރީގެ ޑިފެންސް މިނިސްޓަރު މުހައްމަދު ނާޒިމް (ކާނަލް ނާޒިމް) ހައްޔަރު ކުރި ދުވަސްވަރާއި، މޭޑޭގެ މުޒާހަރާ ކުރި ދުވަސްވަރު ބޭންކުގެ ތެރެއިން ފައިސާގެ ބޮޑެތި މުއާމަލާތްތައް ހިންގާފައިވާ ކަމަށް މޯލްޑިވްސް މަނިޓަރީ އޮތޯރިޓީގެ ފައިނޭންޝިއަލް އިންޓެލިޖެންސް ޔުނިޓް (އެފްއައިޔޫ)ގެ ކުރީގެ ހެޑް އާތިފް ޝަކޫރު ބުދަ ދުވަހު ވިދާޅުވެއްޖެ އެވެ.
އެމްއެމްޕީއާރްސީގެ ހިޔާނާތާ ގުޅިގެން ކުރެވޭ ތުހުމަތު ތަކަށް ޖަވާބުދާރީ ވުމަށް އާތިފްގެ އެދުމުގެ މަތިން އޭނާ ވަނީ ރައްޔިތުންގެ މަޖިލީހުގެ މާލިއްޔަތު ކޮމިޓީއަށް ހާޒިރުކޮށްފަ އެވެ.
އެ ކޮމިޓީގައި ވާހަކަ ދައްކަވަމުން އާތިފް ވިދާޅުވީ، އެފްއައިޔޫ އަށް ސަސްޕީޝަސް ޓްރާންސް ސެކްޝަން ރިޕޯޓިން (އެސްޓީއާރް) ލިބުމާއި އެކު އެކަން ވަރަށް ގާތުން ބަލަމުން ދިޔަ ކަމަށެވެ.
އޭރުގައި ހިނގާފައި ހުރި ބޮޑެތި ސިޔާސީ ކަންތައްތަކާއި އެ ޓްރާންސެކްޝަނާ ކޮންމެވެސް ގޮތަކަށް ގުޅުމެއްވާކަން ފާހަގަކުރެވުނު ކަމަށް އޭނާ ވިދާޅުވި އެވެ.
އެކަންތައްތައް ''ބޮޑު ކަމުން'' އެ ވާހަކަތައް ތަކުރާރުކޮށް އޭރު އެމްއެެމްއޭގެ ގަވަރުނަރަކަށް ހުންނެވި އާޒިމާ އާދަމް އަށް ހިއްސާކުރި ކަމަށް އެފްއައިޔޫގެ ކުރީގެ ހެޑް އާތިފް ވިދާޅުވި އެވެ.
އެއާ އެކު އެފްއައިޔޫގެ ހިންގުމުގެ ސްޓޭންޑަޑް އޮޕަރޭޝަން ޕްރޮސީޖަރ (އެސްއޯޕީ) ބަދަލުކުރުމަށް އަންގައި އެސްޓީއާރް ލިބުމުން ކަންތައް ކުރާ އުސޫލަށް ބަދަލު ގެނެސްފައިވާ ކަމަށް އޭނާ ވިދާޅުވި އެވެ.
