އިޒްރޭލް ޕާސްޕޯޓް މަނާ ކުރުން އޮތް ހިސާބެއް ހޯމް މިނިސްޓަރަށް އެނގި ވަޑައެއް ނުގަތް
މިނިސްޓަރ ވިދާޅުވީ އެޓާރނީ ޖެނެރަލް ކުރެން އެއްސެވުމަށްފަހު ޖަވާބު ދެއްވާނެ ކަމަށް
ހޯމް މިނިސްޓަރ އަލީ އިހުސާން
އިޒްރޭލް ޕާސްޕޯޓް މަނާ ކުރުމުގެ މަސައްކަތް ގޮސްފައި މިހާރު އޮތީ ކިހާ ހިސާބެއްގައިތޯ އާއި އެކަން ކުރުމަށް ބަދަލު ގެންނަނީ ކޮން ގާނޫނަކަށްތޯ ހޯމް މިނިސްޓަރ އަލީ އިހްސާނަށް ނޫސްވެރިއަކު ސުވާލު ކުރުމުން އިސްލާހް ގެންނަނީ ކޮން ގާނޫނަކަށް ކަމެއް މިނިސްޓަރަށް އެނގިވަޑައެއް ނުގަތެވެ.
އާދިއްތަ ދުވަހު ހޯމް މިނިސްޓްރީން އިންތިޒާމް ކުރި ނޫސްވެރިންގެ ބައްދަލުވުމުގައި އިޒްރޭލް ޕާސްޕޯޓް މަނާ ކުރުމާ ބެހޭ ގޮތުން މަސައްކަތް ގޮސްފައި އޮތީ ކިހާ ހިސާބެއްގައިތޯ ދެންނެވުމުން އެކަމާ އެއްވެސް އެއްޗެއްވެސް މިނިސްޓަރު ވިދާޅުވެފައެއް ނުވެއެވެ.
އިސްލާހް ގެންނަނީ ކޮން ގާނޫނަކަށްތޯ ދެންނެވި ސުވާލާ ބެހޭ ގޮތުން އޭނާ ވިދާޅުވީ، އިސްލާހް ގެންނަނީ ކޮން ގާނޫނަކަށް ކަން އެޓަރނީ ޖެނެރަލް އާ މަޝްވަރާ ކުރެއްވުމަށް ފަހު ޖަވާބު ދެއްވާނެ ކަމަށެވެ.
މިނިސްޓަރ އިހްސާން މި މޭރުމުން ޖަވާބު ދެއްވި އިރު އިހްސާން އަކީ ޖޫން މަހުގެ 2 ވަނަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި އިޒްރޭލު މީހުން ރާއްޖެ އަށް އެތެރެވޭ ގޮތަށް އޮންނަ އޮތުން ބަދަލުކުރަން ގާނޫނު އިސްލާހު ކުރަން ސަރުކާރުން އެ ދުވަހު ނިންމި ކަން އިއުލާން ކުރެއްވި ވަޒީރެވެ.
އެދުވަހުގެ ކެބިނެޓް ބައްދަލުވުމަށް ފަހު، ރައީސް އޮފީހުގައި ބޭއްވި ނޫސް ކޮންފަރެންސްގައި މިނިސްޓަރު އިހުސާން ވިދާޅުވީ، ޑރ. މުއިއްޒު ނިންމަވާފައި ވަނީ އިޒްރޭލުގެ މީހުން ރާއްޖެ އެތެރެވިޔަ ނުދިނުމަށްޓަކައި ގާނޫނަށް ގެންނަން ޖެހޭ އިސްލާހުތައް ގެންނަން ކަމަށެވެ. އަދި އެކަމަށް ހާއްސަ ކޮމިޓީއެއް އެކުލަވައިލާފައިވާ ކަމަށްވެސް އޭނާ ވިދާޅުވިއެވެ.
އިޒްރޭލް ޕާސްޕޯޓް މަނާކުރަން ކުރަން ޖެހޭ މަސައްކަތްތައް ކުރުމަށް އެކުލަވާލި މިނިސްޓަރުންގެ ކޮމިޓީގައި ހޯމްލޭންޑް ސެކިއުރިޓީ މިނިސްޓަރ ގެ ހައިސިއްތުން އިހުސާން ހިމެނިވަޑައިގަންނަވައެވެ.
އިޒްރޭލް ޕާސްޕޯޓް މަނާ ކުރުމަށް ރާއްޖޭގެ އިމިގްރޭޝަން އާ ބެހޭ ގާނޫނަށް އިސްލާހް ގެނައުމަށް ރައްޔިތުންގެ މަޖިލީހަށް ހުށަހެޅި ބިލް، މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީގައި އޮންނަތާ މަހަކަށް ވުރެ ގިނަ ދުވަސް ވެފައިވާއިރު، އެ ބިލުގެ މަސައްކަތް ކޮމިޓީން އަދި ފަށާފައި ނުވާ ކަމަށް މަޖިލީހުގެ ރެކޯޑްތަކުން ހާމަވެއެވެ. ކޮމިޓީގައި ބިލުގެ މަސައްކަތް ތާށިވެފައި އޮތް އިރު އޭގެ ފަހުން މަޖިލީހަށް ހުށަހެޅުނު ސަމޯއާ އެގްރީމެންޓްގެ މައްސަލަ މަޖިލީހުން ވަނީ ފާސްކޮށްފައެވެ.
