މުދަލުގެ ޒަކާތް ދޫކުރުން ލަސްވާތީ ބައެއް އާއްމު ރައްޔިތުން ކަންބޮޑުވުން ފާޅުކުރަން ފަށައިފި

މުދަލުގެ ޒަކާތް ދޫކުރުން ލަސްވާތީ ބައެއް އާއްމު ރައްޔިތުން ކަންބޮޑުވުން ފާޅުކުރަން ފަށައިފިއެވެ.

ރާއްޖެއެމްވީއަށް މައުލޫމާތު ދިން މީހެއް ބުނީ މުދަލު ޒަކާތް ކޮންމެ އަހަރެއްގެ އަޟްހާ އީދުގެ ކުރިން ލިބޭ ކަމަށާއި، މިއަހަރުގެ މުދަލު ޒަކާތް ދޫކުރާނެ ދުވަހެއް ނޭނގޭ ކަމަށެވެ. އެކަމުގެ ކަންބޮޑުވުން އިސްލާމިކް މިނިސްޓްރީއަށް ހުށަހެޅި ނަމަވެސް އެދެވޭ ޖަވާބެއް ނުލިބޭ ކަމަށް އޭނާ ބުންޏެވެ. އަދި އެމަސައްކަތް ކުރަމުންދާ ކަމަށާއި، ދޫކުރާނެ ވަކި ދުވަހެއް ހާމަކޮށްފައިނުވާ ކަމަށެވެ.

ރާއްޖެއެމްވީއަށް އިސްލާމިކް މިނިސްޓްރީގެ އޮފިޝަލެއް ވިދާޅުވީ މުދަލުގެ ޒަކާތް ދޫކުރުމަށް ކުރަންޖެހޭ މަސައްކަތްތައް މިހާރު ކުރަމުންދާ ކަމަށެވެ. އެގޮތުން ފަގީރުންގެ ދަފްތަރުގެ އައު އުސޫލު ހަދައި، އެ އުސޫލު ރިވިއު ކުރަމުންދާ ކަމަށް އޮފިޝަލް ވިދާޅުވިއެވެ. އަދި ވިދާޅުވީ އެމަސައްކަތް ނިމުނުހާ އަވަހަށް މުދަލުގެ ޒަކާތް ދޫކުރަން ފަށާނެ ކަމަށެވެ.

މުދަލުގެ ޒަކާތް ސަރުކާރަށް ދައްކަނީ ނިސްބަތުން މަދު ބައެއްކަން ފާހަގަކުރެވިގެން މުދަލުގެ ޒަކާތް ވާޖިބުވާ ހުރިހާ ފަރާތްތަކުން ވެސް މުދަަލުގެ ޒަކާތް ދެއްކުމަށް މީގެ ކުރިން އިސްލާމިކް މިނިސްޓްރީން އިލްތިމާސް ކޮށްފައިވެއެވެ.

މުދަލު ޒަކާތަކީ އިސްލާމްދީނުގެ ރުކުނެކެވެ. އެގޮތުން އެ މީހެއްގެ މިލްކިއްޔާތުގައި ނިސާބުހަމަވާ މިންވަރަށް ފައިސާ ހުރެ، އެ ފައިސާ ހުންނަތާ ހިޖްރީ 01 އަހަރުވުމުން ޝަރްއީ ހަމަތަކާ އެއްގޮތަށް އޭގެ ސާޅީސްބައި ކުޅަ އެއްބައި 2.5 ނެރުމަށް މިނިސްޓްރީން ވަނީ ނަސޭހަތްތެރިވެފައެވެ.