އެމެރިކާގެ ކުރީގެ ރައީސް ޑޮނަލްޑް ޓްރަމްޕަށް ބަޑީގެ ހަމަލާއެއް ދީފިއެވެ.
ބަޑީގެ ހަމަލާ ދިނީ ޕެންސިލްވޭނިއާގެ ބަޓްލަރ ގައި އެތައްހާސް ސަޕޯޓަރުން ޖަމާވެފައިވާ ކެމްޕޭން ރެލީއެއްގައި ވާހަކަފުޅު ދައްކަވަން ހުންނަވަނިކޮށް ހޮނިހިރު ދުވަހު ހަވީރު އެމެރިކާ ގަޑިން 6:15 ގައެވެ.
ޑޮނަލްޑް ޓްރަމްޕްގެ ވާހަކަފުޅުގެ މެދުތެރެއިން ބަޑީގެ އަޑު އިވި، ދެން ފެނުނީ އޭނާ ސްޓޭޖް މައްޗަށް ތިރިވި މަންޒަރެވެ. އެއާއެކު ސެކިއުރިޓީ ސާރވިސްގެ އޮފިޝަލުން ވަނީ ޓްރަމްޕް ވަށާލާ އެތަނުން ދުރަށް ގެންގޮސްފައެވެ.
ޑޮނަލްޑް ޓްރަމްޕް ވަނީ ވަގުތުން ސިއްހީ ޚިދުމަތްދޭ ތަނަކަށް ގެންދެވިފައި ކަމަށާއި، އޭނާ "ރަނގަޅު" ކަމަށް ޓްރަމްޕް ގެ ކެމްޕެއިން އިން ބުނެއެވެ.
ބަޓްލަރ ކައުންޓީގެ ޑިސްޓްރިކްޓް އެޓަރނީ ރިޗަރޑް ގޯލްޑިންގަރ އާ ހަވާލާދީ އެސޯސިއޭޓެޑް ޕްރެސް އިން ބުނެފައިވަނީ ބަޑި ޖެހި މީހާ މަރުވެފައިވާ ކަމަށެވެ.
އެމެރިކާގެ ސިޔާސީ ލީޑަރުން މިހަމަލާ ވަނީ ކުށްވެރިކޮށްފައެވެ.
ހަމާލާގެ ފަހުން ޓްރަމްޕް ޓްރުތް ސޯޝަލް ގައި ކުރެއްވި ޕޯސްޓެއްގައި ވިދާޅުވީ، ވަޒަން ދިޔައީ އޭނާގެ ކަންފަތުގެ މަތީ ކައިރު ފޫ އަޅުވާލާފައި ކަމަށާއި، އެ ވަގުތުން ކަމެއް ގޯސްވެއްޖެ ކަމާއި ވަމުންދާ ގޮތް އެނގިވަޑައިގެންނެވި ކަމަށެވެ.
ވަޒަން ކަންފަތް ފޫއަޅުވާލާފައި ދިއުމުގެ ސަބަބުން ވަރަށް ގިނަ ލެއި އައި ކަމަށްވެސް ޓްރަމްޕްގެ ޕޯސްޓުގައި ވެއެވެ.
ޓްރަމްޕްގެ ހަށިކޮޅަށް ބަޑިޖެހި މީހާގެ ގަޔަށް ބަޑި ޖަހާ މަރާލީ ސީކްރެޓް ސާވިސްގެ އޮފިސަރެއް ކަމަށް ސީކްރެޓް ސާވިސް އިން ބުނެފައިވެއެވެ.
ބަޑި ޖެހި މީހާ ހުރީ ރެލީގެ ސަރަހައްދުން ބޭރުގައި ހުރި އިމާރާތެއްގެ މަތީގައި ކަމަށާއި، ޓްރަމްޕަށް އަމާޒުކޮށް އެތައް ވަޒަނެއް ފޮނުވާލި ކަމަށްވެސް ސީކްރެޓް ސާވިސް އިން ބުނެފައިވެއެވެ.
