ޕާކިންގ މައްސަލައަށް ހައްލެއް ލިބިގެންދާނީ ރަޖިސްޓްރީ ކުރެވޭ އުޅަނދު ފަހަރުތައް ކޮންޓްރޯލް ކުރެވިގެން: މިނިސްޓަރ
7 އޯގަސްޓު 2019 | ބުދަ 04:54ގިނަ ޕާކިން ޒޯންތަކެއް ހެދިގެން ދާނެކަމަށް ވިދާޅުވި
ޓްރާންސްޕޯޓް މިނިސްޓަރު އައިޝަތު ނަހުލާ
މާލޭ ޕާކިންގ މައްސަލައަށް ހައްލެއް ލިބިގެންދާނީ ރަޖިސްޓްރީ ކުރެވޭ އުޅަނދު ފަހަރުތަކުގެ އަދަދު ކޮންޓްރޯލް ކުރެވިގެން ކަމަށް ޓްރާންސްޕޯޓް މިނިސްޓަރު އައިޝަތު ނަހުލާ ވިދާޅުވެއްޖެ އެވެ.
ޕާކިންގ މައްސަލާ އަށް އެކަށީގެންވާ ހައްލެއް ލިބިފައިނުވާތީ އާއި ސްޓިކާޖަހާ މައްސަލާގައި ބުދަ ދުވަހު ރައްޔިތުންގެ މަޖިލީހުގައި ކާށިދޫ ދާއިރާގެ މެމްބަރު ކުރެއްވި ސުވާލަކަށް ޖަވާބު ދެއްވަމުން ޓްރާންސްޕޯޓް މިނިސްޓަރު ނަހުލާ ވިދާޅުވީ، ތޮއްޖެހިފައިވާ މާލޭގެ މަގުތަކަށް ފަސޭހަ ބަދަލުތަކަށް ގެނައުމަށް މި ސަރުކާރުން މަސައްކަތް ކުރަމުންދާ ކަމަށެވެ. އެގޮތުން މި އަހަރުގެ ތެރޭގައި ސައިކަލް ތަކަށް 1000 އާއި 1500 ދޭތެރޭގެ ޕާކިން ޒޯންތަކެއް ހެދުމަށް ނިންމާފައިވާ ކަމަށާއި، ހަތަރު ފުރޮޅުލި އުޅަނދުތަކަށް 100 އަށް ވުރެ ގިނަ ޕާކިން ސްލޮޓް ހަމަޖެހިގެން ދާނެ ކަމަށް ވިދާޅުވި އެވެ.
މާލޭގައި މިހާތަނަށް ޕާކިންގ ޒޯންގެ ގޮތުގައި ތައްޔަރުކޮށްފައިވާ ތަންތަނަކީ، މަޖީދިއްޔާ ސްކޫލް ކުރިމަތި، ފިނޭންސް މިނިސްޓްރީ ކައިރީ ޕާކިން ޒޯން، އެމްއެމްއޭ ކައިރީ އޮންނަ ޕާކިން ޒޯންގެ އިތުރުން މާފަންނު ސަހަރާ ކައިރި އޮތް ޕާކިންގ ޒޯން އެވެ.
މިނިސްޓަރ ނަހުލާ ވަނީ މާލޭގެ ޕާކިންގ މައްސަލައަށް ހައްލެއް ހޯދުމަށް ގިނަ މަސައްކަތްތަކެއް ކުރަމުން އަންނައިރު، މުޅި މައްސަލައަށް ހުރި ހައްލުތައް ހޯދާ މިހާރު ވަޒީރުންގެ މަޖިލީހަށް ކަރުދާހެއް ހުށަހަޅާފައިވާކަމަށެވެ. އަދި އެ ކަރުދާހުގައި ހުރި މައްސަލަތަކާއި ހައްލުތައްވެސް ފާހަގަކޮށްފައިވާނެކަމަށް މިނިސްޓަރ ވިދާޅުވި އެވެ.
