ޕްރީ ސީޒަންގައި އާސެނަލުން ކުޅުނު ފަހު މެޗުން ބަލިވެއްޖެ

ޕްރީ ސީޒަންގައި އާސެނަލް އަދި ބާސެލޯނާ ބައްދަލުކުރި މެޗުން އާސެނަލް ބަލިވެއްޖެއެވެ.

ބާސެލޯނާގެ ދަނޑުގައި ބާސެލޯނާއިން ކުޅުނު މެޗް ކާމިޔާބުކުރީ 2-1 ގެ ނަތީޖާއަކުންނެވެ.

ފޯރިގަދަ ކުޅުމެއް ފެނިގެން ދިޔަ މި މެޗުގައި ބާސެލޯނާއިން ޖެހި ފުރަތަމަ ލަނޑަކީ އާސެނަލްގެ ކުޅުންތެރިޔެއް ގައިގައި ޖެހިފައި ބައިކޮޅަށް ވަން ލަނޑެކެވެ. ބާސެލޯނާ މޮޅުކޮށްދިން ލަނޑު އެޓީމަށް ކާމިޔާބު ކޮށްދިނީ ލުއިސް ޝުއަރޭޒްއެވެ.

މި މެޗުގައި ބާސެލޯނާއާއި ދާދިފަހުން ގުޅުނު ފްރާންސްގެ ފޯވާޑް ގްރީޒްމަން ކުޅެފައިވާއިރު ބާސެލޯނާގެ ކެޕްޓަން ލިއޮނަލް މެސީ އިނީ ކުޅިބަލަންށެވެ.

ބާސެލޯނާއިން އަންނަ ސީޒަނަށް އެޓީމުގެ ސްކޮޑް ވަރުގަދަ ކުރަމުން އަންނަ އިރު މީޑިއާ ރިޕޯޓްތައް ބުނާ ގޮތުން ކުރިއަށް އޮތް ސީޒަން ފެށުމުގެ ކުރިން އެޓީމުން އާ ކުޅުންތެރިން ގުޅޭނެ ކަމަށް ބެލެވެއެވެ. ދާދިފަހުން ބާސެލޯނާގެ ރައީސް ވަނީ އާ ކުޅުންތެރިން ފެނިދާނެ ކަމުގެ އިޝާރާތެއް ދީފައެވެ. އެ ގޮތުން ބާސެލޯނާގެ ރައީސް ޖޯސެފް ބުނީ އަންނަ ސީޒަން ފެށުމުގެ ކުރިން އިތުރު ފޯވާޑެއް އެޓީމުން ފެނުން ގާތް ކަމަށެވެ.