މިނިސްޓްރީ އޮފް ފޮރިން އެފެއާޒްގެ ހިންގުން ވަގުތީ ގޮތުން އެހެން އިމާރާތަކަށް ބަދަލު ކުރުމަށް ނިންމައިފިއެވެ.
ފޮރިން މިނިސްޓްރީން ކުރި އިއުލާނެއްގައި ބުނީ، އިމާރަތް ހިންގާ ތަން ބަދަލުކުރަނީ މިނިސްޓްރީ ހިންގަމުންދާ އިމާރާތުގެ މަރާމާތުގެ މަސައްކަތެއް ކުރިއަށް ގެންދިއުމަށްޓަކައި ކަމަށެވެ. އެގޮތުން 15 އޯގަސްޓް 2019 ގައި މިނިސްޓްރީގެ މަރާމާތުގެ މަސައްކަތް ފެށުމަށް ހަމަޖެހިފައިވާ ކަމަށްވެސް އިއުލާނުގައި ބުނެފައިވެއެވެ.
މިނިސްޓްރީން ބުނިގޮތުގައި އިމާރަތް ބަދަލުވެ ވަގުތީ އިމާރާތުގައި މަސައްކަތް ފެށުމަށް ހަމަޖެހިފައިވަނީ 6 ސެޕްޓެމްބަރ 2019 ގަ އެވެ.
މިނިސްޓްރީން ބުނީ މަރާމާތުގެ މަސައްކަތް ނިމެންދެން ވަގުތީ ގޮތުން މިނިސްޓްރީގެ މަސައްކަތްތައް ކުރިއަށްގެންދާނީ ބޮޑުތަކުރުފާނު މަގުގައި ހުންނަ އެމް.ޓީ.ސީ.ސީ. ސޯމިލް ރިލޮކޭޝަން ބިލްޑިންގ (ހުޅުމާލޭ ފެރީ ޓަރމިނަލް ގެ އިރުމަތީ ފަރާތުގައި ހުރި އިމާރާތް) ގައި ކަމަށެވެ.
ފޮރިން މިނިސްޓްރީ ހިންގާ އިމާރަތް ވަގުތީގޮތުން ބަދަލުކުރާ ދުވަސްތަކުގައި ޚިދުމަތްތައް ހޯދުމުގައި ދިމާވެދާނެ ދަތިތަކަށް އެ މިނިސްޓްރީން ވަނީ މާފަށްއެދިފައެވެ.
