ޓެރަރިޒަމާއި ބެހޭ ގޮތުން ޚާއްސަ ލެކްޗާއެއް އައިޔޫއެމްގައި ބާއްވައިފި
5 އޯގަސްޓު 2019 | ހޯމަ 04:14ދީނާ ގުޅޭ މައުލޫމާތު އިތުބާރު ކުރެވޭ މަސްދަރުތަކުން ހޯދުމަކީ ވަރަށް މުހިންމު ކަމެއް
ޑރ. އެންތޮނީ އަބްދުލް ހައްގު ބޭކާ
ހައްދުފަހަނައަޅާދިއުމާއި ޓެރަރިޒަމާއި ބެހޭ ގޮތުން ޚާއްސަ ލެކްޗާއެއް އިސްލާމިކް ޔުނިވަރސިޓީ (އައިޔޫއެމް)ގައި ބާއްވައިފިއެވެ.
އެ ޔުނިވަރސިޓީގައި ބޭއްވި ލެކްޗާ ނަންގަވާ ދެއްވީ އިނގިރޭސިވިލާތުގެ ތަޖުރިބާކާރެއް ކަމަށްވާ ޑރ. އެންތޮނީ އަބްދުލް ހައްގު ބޭކާއެވެ. އޭނާ ވަނީ ހައްދުފަހަނައަޅާ ދިއުމާއި ޓެރަރިޒަމާއި ބެހޭ ގޮތުން ގިނަ ދިރާސާތަކެއް ކޮށްފައެވެ. އަދި ހައްދުފަހަނައަޅާދާ މީހުން އަނބުރާ މުޖުތަމައުއަށް ގެނައުމުގައި މުހިންމު މަސައްކަތްތަކެއް ކޮށްފައެވެ.
މިލެކްޗާގައި ޑރ. އެންތޮނީ ހައްގު ބޭކާ ވަނީ ޒުވާނުން ހައްދުފަހަނައަޅާ ދިއުމަށް މެދުވެރިވާ ސަބަބުތަކުގެ މައްޗަށް ވާހަކަދައްކަވާފައެވެ. އިސްލާމް ދީނުގެ ރަނގަޅު މައުލޫމާތު ނުލިބުމަކީ އޭގެ އެއް ސަބަބު ކަމަށާއި، އިސްލާމްދީނާއި ގުޅޭ މައުލޫމާތު އިތުބާރު ކުރެވޭ މަސްދަރުތަކުން ހޯދުމަކީ ވަރަށް މުހިންމު ކަމެއް ކަމަށް އޭނާ ވިދާޅުވިއެވެ.
ޑރ.އެންތޮނީ ހައްގު ބޭކާ ވިދާޅުވީ ޒުވާނުން ޓެރަރިޒަމްގެ ހަރަކާތްތަކުގައި ބައިވެރިކުރުމަށް ހިތްވަރުދޭ މީހުން ބޭނުންކުރަމުންދަނީ އެންމެ ފަހުގެ ނެކްނޮލޮޖީއާއި ވަސީލަތްތައް ކަމަށެވެ. އެހެންކަމުން މިކަންކަމަށް ފާރަވެރިވުމަކީ މުހިންމު ކަމެއް ކަމަށް އޭނާ ވިދާޅުވިއެވެ.
އާންމުކޮށް ހުޅުވާލައިގެން ބޭއްވި މިކެލްޗަރގައި 235 ފަރާތަކުން ބައިވެރިވިއެވެ.
އިސްލާމިކް ޔުނިވަރސިޓީން ވަނީ ޒުވާނުންނަށް ޚާއްސަކޮށްގެން އިސްލާމްދީނާއި ސުލްހަވެރިކަމާއި ބެހޭ ގޮތުން ފޯރަމެއް ވެސް ބާއްވާފައެވެ. ޒުވާނުންނަށް ޚާއްސަކޮށްގެން ބޭއްވި މިފޯރަމްގައި ޑރ.އެންތޮނީ އަބްދުލް ހައްގު ބޭކާގެ އިތުރުން ޑރ.އިބްރާހިމް ޒަކަރިއްޔާ މޫސާ އާއި ނެޝަނަލް ކައުންޓަރ ޓެރަރިޒަމް ސެންޓަރާއި ސޮސައިޓީ ފޮރ ހެލްތް އެޑިއުކޭޝަންގެ ފަރާތުން ޚާއްސަ ސެޝަންތަކެއް ވަނީ ކުރިއަށް ގެންގޮސްފައެވެ. މިފޯރަމްގައި 35 ފަރާތަކުން ބައިވެރިވިއެވެ.
ޑރ.އެންތޮނީ ހައްގު ބޭކާއަކީ މީގެ 29 އަހަރު ކުރިން 1990 އަހަރު ގައި އިސްލާމްދީނުގެ ހިދާޔަތުލިބި އިސްލާމިްދީނުގެ އިލްމު ފެތުރުމަށް މަސައްކަތް ކުރާ ފަރާތެކެވެ. އޭނާގެ ޕީއެޗްޑީ ތީސިސް ވެސް ބިނާ ވެފައިވަނީ އިނގިރޭސި ވިލާތުގައި އަލަށް އިސްލާމްދީން ގަބޫލުކުރާ މީހުން ހައްދުފަހަނައަޅައި ދިއުމަށް މަގުފަހިވާ ކަންކަމުގެ މައްޗަށްށެވެ.
ދީނާއި ގުޅޭ ދިރާސާ މައުލޫމާތު ފެތުރުމުގެ ގޮތުން އިސްލާމިކް ޔުނިވަރސިޓީން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން އިސްލާމީ ޔުނިވަރސިޓީ ބާއްވާ އިންޓަނޭޝަނަލް ކޮންފަރެންސް އޮން އިންޓަލެކްޗްއަލް އެޑްވާންސްމެންޓް (އައިސީއައިއޭ) ކޮންފަރެންސް މިމަހު 31 އިން ސެޕްޓެންބަރ އެކަކަށް އޮންނާނެވެ.
