އިންޓަނޭޝަނަލް ކަޕް އޮފް ޖޯއި: ކުޅުނު ފުރަތަމަ މެޗުން މާޒިޔާ ބަލިވެއްޖެ

އިންޑިއާގައި 14 އަހަރުން ދަށުގެ ކުޅުންތެރިންނަށް އަމާޒުކޮށްގެން ބާއްވާ އިޓަނޭޝަނަލް ކަޕް އޮފް ޖޯއިގައި މާޒިޔާ ކުޅުނު ފުރަތަމަ މެޗުން ބަލިވެއްޖެއެވެ.

ބުރާސްފަތި ދުވަހު ކުޅުނު މެޗުން މާޒިޔާ ބަލިވީ ރިލަޔަންސް އެކަޑަމީއާ ވާދަކޮށް 1-2 ގެ ނަތީޖާއަކުންނެވެ.

އިންޑިއާގެ ކެލަމްބަކަމްގެ ޗެޓިނާދް ސްކޫލުގައި ކުޅުނު މި މެޗުގައި ފުރަތަމަ ލަނޑު ޖަހާ ލީޑު ނެގީ މާޒިޔާއިންނެވެ. މި ލަނޑު މެޗު ފެށިގެން ދެވަނަ މިނެޓުގައި ކާމިޔާބު ކުރީ މުހައްމަދު ޝިބްތުއެވެ.

ނަމަވެސް ރިލަޔަންސްއިން ވަނީ ފުރަތަމަ ހާފް ނިމުމުގެ ކުރިން ދެ ލަނޑު ކާމިޔާބުކޮށް މެޗުގެ ލީޑު އަނބުރާ ހޯދާފައެވެ. ދެވަނަ ހާފްގައި މާޒިޔާއިން ވަނީ މޮޅު ކުޅުމެއް ދައްކާ، ލަނޑު ޖެހުމަށް ރަނގަޅު ފުރުސަތުތަކެއް ވެސް ތަނަވަސް ކޮށްފައެވެ.

މުބާރާތުގައި މާޒިޔާ ކުޅޭ ދެވަނަ މެޗުގައި ހުކުރު ދުވަހު ނިކުންނާނީ ފަސްޓް ކިކް އެސްއެސްއޭއާ ދެކޮޅަށެވެ.

މިއީ މި މުބާރާތް ބާއްވާތާ ތިންވަނަ ފަހަރަށްވާއިރު، މިއީ މުބާރާތުގައި ރާއްޖޭގެ އެކަޑަމީއަކުން ބައިވެރިވި ފުރަތަމަ ފަހަރުކަން ފާހަގަ ކޮށްލެވެއެވެ. މުބާރާތުގައި އިންޑިއަން ސުޕަ ލީގު އަދި ބޮޑެތި ފުޓުބޯޅަ އެކަޑަމީތަކުން ވެސް ބައިވެރިވެއެވެ.